Jeŭrapiejski humanitarny univiersitet (EHU), jaki atrymaŭ niehatyŭnyja acenki litoŭskich ekśpiertaŭ, stracić dazvoł ažyćciaŭlać navučańnie sa studzienia 2019 hoda, piša Delfi.
Adnak namiečana, što kali budzie ŭmacavany akademičny i navukovy patencyjał EHU, to jon zmoža padać zajaŭku na atrymańnie novaha dazvołu. Takoje rašeńnie prapanavała Ministerstva adukacyi i navuki Litvy. Mahčymaści dalejšaj pracy EHU ŭrad pavinien razhledzieć na svajoj naradzie ŭ sieradu.
Pryniać rašeńnie ab adklikanni dazvołu EHU ažyćciaŭlać navučańnie studentaŭ ministr adukacyi i navuki Litvy pavinna da 26 lutaha.
Centr acenki jakaści navučańnia, jaki zajaviŭ pra niehatyŭnuju acenku ŭstanovy, zaznačaje, što takaja acenka źjaŭlajecca padstavaj dla adklikańnia dazvołu na ažyćciaŭleńnie navučańnia i źviazanaj z navučańniem dziejnaści.
U 2014 h. dziejnaść EHU taksama atrymała niehatyŭnyja acenki, tady ŭniviersitet atrymaŭ akredytacyju tolki na try hady. U novaj spravazdačy niehatyŭnyja vodhuki atrymali stratehičnaje kiravańnie i navukovaja i (abo) mastackaja dziejnaść EHU.
Univiersitet nie pahadziŭsia z takimi vynikami acenki. Pa słovach kiraŭnictva ŭstanovy, praviedzienyja ŭ 2015-2017 hadach reformy akazali istotny ŭpłyŭ na raźvićcio stratehičnaha kiravańnia, navučańnia va ŭniviersitecie, što pryznali i donary EHU na kanfierencyi donaraŭ u listapadzie 2017 hoda. Univiersitet tady taksama paviedamiŭ, što źviarnuŭsia ŭ Ministerstva adukacyi i navuki z aficyjnaj prapanovaj adnosna ŭzajemaprymalnaha pahadnieńnia, jakoje dazvoliła b biełaruskamu ŭniviersitetu praciahnuć pracu ŭ Vilni.
***
EHU — pryvatny univiersitet, jaki byŭ zasnavany ŭ 1992 hodzie ŭ Minsku i paśla byŭ zakryty biełaruskimi ŭładami. U 2004 hodzie ŭniviersitet pryniaŭ zaprašeńnie litoŭskaha ŭrada i pierajechaŭ u Vilniu. Zaraz u EHU navučajecca amal 800 studentaŭ, 95% ź ich — biełarusy.
Kamientary