Lidar Abjadnanaj hramadzianskaj partyi Anatol Labiedźka patłumačyŭ «Našaj Nivie», čamu nie moža atrymać novaje paśviedčańnie kiroŭcy.
Nahadajem, što niadaŭna jaho zatrymali daišniki i pakarali za jazdu biez pravoŭ — Labiedźka śćviardžaje, što nieabchodnyja dakumienty jamu nie vydajuć z nadumanych pryčyn.
«Ja viadu aktyŭny ład žyćcia: futboł, bieh, rovar. Pazaletaś u mai ja jechaŭ na rovary niedalok ad Płoščy dziaržaŭnaha ściaha, prajechaŭ kala kupki amapaŭcaŭ i ludziej u cyvilnym dy straciŭ prytomnaść. Pamiataju, kali ačuniaŭ, što vakoł mianie mitusilisia ludzi, ale heta byli nie amapaŭcy. U narmalny stan ja pryjšoŭ u chutkaj dapamozie. Jany skazali, što adpuścić adrazu mianie nie mohuć, tamu advieźli na abśledavańnie. Tam ja prajšoŭ tamahrafiju: nijakich adchileńniaŭ nie zafiksavana, usio ŭ normie. Heta za 55 hod majho žyćcia byŭ pieršy vypadak, kali ja straciŭ prytomnaść. Ja spytaŭ u daktaroŭ, ci mahčyma takoje, što niešta raspylili ŭ pavietry, što mianie adklučyła? Jany kažuć, što ŭsio mahčyma, ale hetaha ŭžo nie zafiksavać», — raskazaŭ Labiedźka.
Potym jon zabyŭ pra hety vypadak, pakul nie paŭstała pytańnie abnaŭlać paśviedčańnie.
«Ja pajechaŭ u palikliniku, prajšoŭ usich daktaroŭ, a kali treba było atrymać daviedku, raptam uźnikli prablemy: «u vas tam byŭ epizod, kali stracili prytomnaść». I što? Jość vypiska z balnicy za toj dzień, što ŭ mianie ŭsio ŭ normie. Ale mnie skazali, kab jašče raz prajšoŭ abśledavańnie. I ja prajšoŭ — na samaj dakładnaj aparatury, jakaja paćvierdziła, što ŭsio dobra. Ale kamisija z troch čałaviek vyrašyła, što nie moža mnie dać daviedku ŭ suviazi z toj strataj prytomnaści», — padsumavaŭ Labiedźka.
Jon nastojvaje, što ŭsio heta — pravakacyi śpiecsłužbaŭ suprać jaho.
«Daktary ŭ kułuarach kazali, što nie jany prymajuć rašeńnie ŭ majoj situacyi», — dadaŭ palityk.
Varta adznačyć, što akurat u mai 2016 hoda ŭ rajonie Płoščy dziaržaŭnaha ściaha adbyłosia zdareńnie: minskija amapaŭcy stali śviedkam taho, jak u ravarysta nibyta zdaryŭsia epileptyčny prypadak, z rota ŭ jaho pajšła piena.
«Pravaachoŭniki akazali mužčynu pieršuju dapamohu: raścisnuli skivicu i ŭtrymlivali jazyk, kab adnavić dychańnie. Praź niekalki chvilin na miesca zdareńnia prybyła bryhada chutkaj dapamohi, jakaja kanstatavała prystup epilepsii. Miedyki adznačyli, što kab nie svaječasovaja dapamoha milicyjanieraŭ, to paciarpiełaha možna było b i nie vyratavać», — cytuje BIEŁTA pres-słužbu minskaha HUUS.