Na prezentacyju knihi Viačasłava Rakickaha «Biełaruskaja Atlantyda» adbyłasia 25 traŭnia ŭ Pałacy mastactvaŭ pryjšoŭ badaj uvieś mienski mastacki śviet.
Na prezentacyju knihi Viačasłava Rakickaha «Biełaruskaja Atlantyda» adbyłasia 25 traŭnia ŭ Pałacy mastactvaŭ pryjšoŭ badaj uvieś mienski mastacki śviet. Aproč tradycyjna frandziorskich Akudoviča, Ancipienki, Arłova, byŭ navat kiraŭnik Sajuzu mastakoŭ Uładzimier Basałyha, jaki j daŭ zalu dla prezentacyi. Prezentacyja ŭ centry Miensku knihi, vydadzienaj na amerykanskim Radyjo Svaboda, u našyja dni vyhladaje ledź nie epatažam.
«Biełaruskaja Atlantyda» – dziasiataja kniha ŭ seryi «Biblijateki Svabody». U vydańnie ŭvajšli pieradačy adnajmiennaj seryi pieradačaŭ, jakuju mastactvaznaŭca V.Rakicki viadzie na «Svabodzie». Pry ilustracyi knihi byli vykarystanyja aforty adnaho z najbolš cikavych sučasnych hrafikaŭ – Valerja Słavuka, hienijalnaha ilustratara «Šlachcica Zavalni». Stvoranyja im persanažy ŭvačavidki aduchaŭlajuć schavanuju za toŭščaj času.
Ciaham apošniaha dziesiacihodździa ŭ andehraŭnd musiła syści praktyčna ŭsia biełaruskaja kultura: ciapier maciaryk biełaruskaj historyi adkryvajecca tolki praź niedziaržaŭnyja radyjo, hazety, časopisy. U andehraŭnd patrapili nia tolki takija temy, jak «Maskoŭskija niavolniki ŭ Mahilovie» albo «Kalanijalnaje i niezaležnickaje śvietabačańnie», ale i zusim nibyta biaskryŭdnyja «Smak syru», «Zahadki j razhadki snoŭ», «Vykarystańnie ćvikoŭ»... Kiraŭnik Biełaruskaj redakcyi «Svabody» Alaksandar Łukašuk raspavioŭ, što adna ź mienskich FM-stancyjaŭ viała pieramovy z «Svabodaj» pra nabyćcio jakich-kolviečy pieradačaŭ. Łukašuk prapanavaŭ «Biełaruskuju Atlantydu»: u jakaści prynady nazvaŭ temu «Seks i kantracepcyja ŭ Vialikim Kniastvie Litoŭskim». Kiraŭnictva radyjostancyi zacikaviłasia, pačalisia pieramovy, ale... Nieŭzabavie jany byli spynienyja, hałoŭny redaktar FM-stancyi apynuŭsia ŭ emihracyi ŭ Kijevie, pradusar taksama raźvitaŭsia z svajoj pasadaj.
Hości-suaŭtary Rakickaha ŭvasablali abaznačanyja imi temy. Filozaf Akułdovič razvažaŭ pra intelektuałaŭ: «Jak u Italii soramna nia ŭmieć śpiavać, tak u Biełarusi siońnia soramna nia być intelektuałam. Kab schavać svoj soram za adsutnaść intelektualnaści, kiraŭnik Biełarusi buduje biblijateku. Možacie ŭjavić pamiery taho soramu pavodle pamieraŭ biblijateki...» Vacłaŭ Areška, reprezentavany ŭsim jak šlachcič, raspaviadaŭ pra spakonviečnyja šlachieckija rysy: «Kali ja čytaŭ šlachieckija memuary ci apisańni sojmikaŭ, to ŭ mianie składałasia ŭražańnie, što čytaju spravazdačy z apazycyjnych naradaŭ: tam usio tyja ž Paźniaki, Statkievičy, Chadyki...» Falklarystka Lija Sałaviej raspaviadała pra čaradžziejnyja ŭłaścivaści ptušak dy rolu ich u čałaviečym žyćci. A Siarhiej Dubaviec, aŭtar «Vostraj Bramy», pavinšavaŭšy kalehu, adznačyŭ: «Šmat jość roznych biełaruskich Atlantydaŭ. Ja pryjechaŭ siudy ź Vilni – jašče adnoj biełaruskaj Atlantydy». I paprasiŭ u padarunak jašče paru asobnikaŭ knihi Rakickaha: maŭlaŭ, na zvarotnym šlachu prasili prychapić z saboj biełaruskija mytniki...
Skončyłasia prezentacyja razdačaj knih, ale i tut nie abyšłosia bieź siurpryzaŭ: kab atrymać padarunak, treba było adkazać na kolki pytańniaŭ ankiety. Praviercie siabie: U jakich biełaruskich vadajomach vadzilisia cmoki? Chto ź vialikich nazvaŭ Pinskaje bałota moram? Kali ŭ Biełarusi pačali vyroščvać bulbu (stahodździe i ŭładca)? Jakimi kalonijami vałodała Biełaruś u staražytnaści? U zale znajšoŭsia nie adzin čiaałaviek, jaki pravilna adkazaŭ na hetyja dy inšyja pytańni. Žyvie biełaruskaja Atlantyda!
Adam Voršyč
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary