Homielski juryst Ihar Słučak źviarnuŭsia ŭ Pałatu pradstaŭnikoŭ z prapanovaj zrabić abaviazkovym vydańnie ŭsich narmatyŭnych aktaŭ na dźviuch movach: jak pa-rusku, tak i pa-biełarusku.
Kanstytucyjny cud pryvodzić źviestki, pavodle jakich tolki 3,1% aktaŭ z 200 tysiač apublikavanych majuć biełaruskuju viersiju.
Tolki 47 zakonaŭ Biełarusi pryniatyja i apublikavanyja pa-biełarusku.
Siońnia, pavodle zakanadaŭstva, akty dziaržaŭnych orhanaŭ Biełarusi prymajucca tolki na adnoj ź dziaržaŭnych moŭ. Publikujucca jany paśla na toj movie, na jakoj byli pryniatyja.
Słučak źviartaje ŭvahu, što samo pa sabie pryniaćcie narmatyŭnaha pravavoha akta na adnoj movie nie dyskryminuje hramadzian. Ale dyskryminuje adsutnaść pierakładu na druhuju dziaržaŭnuju movu. Hamialčuk prapanoŭvaje publikavać usie aficyjnyja dziaržaŭnyja dakumienty adnačasova na dźviuch movach. I pakul heta nie zroblena, nie ličyć akt apublikavanym.
Ale z aficyjnaha adkazu za podpisam namieśnika staršyni pastajannaj kamisii Pałaty pradstaŭnikoŭ pa zakanadaŭstvie Maksima Miśko vynikaje, što dla dziaržavy heta nieapraŭdana vialikija vydatki.
U liście havorycca, što dublavańnie pakieta supravadžalnych dakumientaŭ da prajektaŭ pryviadzie da značnaha pavieličeńnia materyjalnych i časovych zatrat na padrychtoŭku, razhlad i pryniaćcie zakonaprajektaŭ. Praz heta daviadziecca pavialičyć štat dziaržsłužačych, što «supiarečyć rabocie, jakaja pravodzicca ŭ krainie pa aptymizacyi dziaržaŭnaha aparatu».
Akramia taho, adznačajecca, što spatrebicca pierahladać paradak ažyćciaŭleńnia ŭsich narmatvorčych pracedur, pačać ich dublavać, a taksama ŭvieści praceduru paćviardžeńnia aŭtentyčnaści tekstaŭ prajektaŭ.
Usio heta «paciahnie nieabchodnaść pryciahnieńnia dadatkovych biudžetnych srodkaŭ», što, pavodle ŭkaza kiraŭnika dziaržavy, musić być uzhodniena ź im asabista.
* * *
46-hadovy Maksim Miśko — deputat Pałaty pradstaŭnikoŭ ad Minska. Jon zastajecca staršynioj praŭładnaha «Fonda miru» (heta arhanizacyja naličvaje 15 tysiač siabroŭ i spraŭna ŭładkoŭvaje ich u jakaści naziralnikaŭ i členaŭ kamisij na vybarach), a taksama ličycca pieršym namieśnikam staršyni Biełaruskaha sajuza kadzietaŭ i suvoraŭcaŭ.
Na jaho miesca ŭ parłamiencie mieŭsia być abrany biełaruskamoŭny historyk Vadzim Łakiza, ale litaralna za niekalki dzion da hałasavańnia «pryjarytety» dziaržavy źmianilisia. Miśko naličyli 44% hałasoŭ.
Kamientary