Śledčy kamitet: Videakamiery nie zafiksavali padzieńnia dziaŭčyny ŭ «Dana-mole»

Śledčyja vyśviatlajuć akaličnaści śmierci 28-hadovaj dziaŭčyny ŭ handlovym centry ŭ Minsku, paviedamiła aficyjnaja pradstaŭnica SK pa Minsku Maryna Drańkova.

Pavodle atrymanych źviestak, 24 lutaha 2018 hoda kala 17 hadzin 30 chvilin u handlovym centry pa adrasie: h. Minsk, vuł. P.Mścisłaŭca, 11, 28-hadovaja žycharka stalicy zaniadužała. Jana paviedamiła pra heta pa telefonie svajmu znajomamu, jaki vyklikaŭ joj taksi. Kiroŭca supravadziŭ dziaŭčynu ŭ apteku, dzie jaje samaadčuvańnie rezka pahoršała. Supracoŭniki apteki i chutkaj miedycynskaj dapamohi pravodzili reanimacyjnyja mierapryjemstvy, adnak vyratavać dziaŭčynu nie ŭdałosia.

Pieršamajskim (h. Minska) rajonnym adździełam Śledčaha kamiteta pa hetym fakcie pravodzicca pravierka. Z metaj vyśviatleńnia abstavinaŭ praviedzieny ahlad miesca zdareńnia, vyvučajucca videazapisy kamier nazirańnia handlovaha centra, apytvajucca vidavočcy zdareńnia i blizkija dziaŭčyny. Dla vyśviatleńnia dakładnaj pryčyny śmierci pryznačana sudova-miedycynskaja ekśpiertyza.

Aficyjny pradstaŭnik Śledčaha kamiteta Julija Hančarova dapaŭniaje: videakamiery nie zafiksavali padzieńnia paciarpiełaj.

Pra abstaviny trahiedyi «NN» raskazała adna z čytačak:

«Na žal, ja stała vidavočcaj trahiedyi. Nie viedaju, ci padała dziaŭčyna. Ale jana spačatku siadzieła la tualetaŭ, a paśla ŭžo na kreśle la apteki, i kazała, što jana nie moža dychać. Jana nie mahła naohuł ničoha adkazać, tolki što nie moža dychać. Farmaceŭt z apteki biehała vakoł jaje. Jana i jašče adna žančyna sprabavali pryvieści jaje ŭ prytomnaść, davali našatyr, mužčyna byŭ pobač, vyklikaŭ chutkuju, ale jana adklučyłasia, i pajšła piena z rota. Tamu jaje pakłali na padłohu na bok, padumali, moža epilepsija. Potym joj dapamahała jašče adna žančyna, kazała, što lekarka, rabili joj masaž serca i štučnaje dychańnie, potym u jaje pajšła kroŭ z nosa burbałkami. Nakont ciažarnaści ja sumniajusia, u jaje spačatku nie było žyvata, jon, mnie zdajecca, razdźmuŭsia, kali joj masaž serca rabili. Chutkaja pryjechała, pačali jaje reanimavać. Joj zrabili ŭsio, što mahli dla vyratavańnia. Ja, sa svajho boku, nie viedaju, čym jašče možna było dapamahčy, taksama biehała vakoł i nie viedała, što rabić. Niachaj ziamla joj budzie pucham, i daruj, kali nie zmahli dapamahčy», — napisała čytačka «Našaj Nivy» ŭ kamientarach.

• 0
• 0
• 0
• 0
• 0
• 0
• 0
• 0