Bijołahi znajšli suviaź pamiž niucham i palityčnymi pohladami: ludzi z vostrym niucham lubiać dyktataraŭ
Niejrafizijołahi z Univiersiteta Stakholma vyjavili niezvyčajnuju suviaź pamiž vastrynioj niuchu i palityčnymi pieravahami: čym vastrej čałaviek reahuje na pach potu i vyłučeńniaŭ inšych ludziej, tym pazityŭniej jon stavicca da aŭtarytaryzmu i dyktataraŭ, havorycca ŭ daśledavańni, apublikavanym u Royal Society Open Science.
Za apošnija hady niejrafizijołahi, bijołahi i psichołahi vyjavili mnostva namiokaŭ na toje, što mnohija sacyjalnyja i asabistyja pieravahi ludziej nieparyŭna źviazanyja z tym, jak pracujuć ich orhany pačućciaŭ i jak praciakała evalucyja čałavieka ŭ minułym. Naprykład, dva hady tamu było dakazana, što ludzi schilnyja bolš daviarać vysokim i śvietłaskurym lidaram u časy kryzisu.
I voś, navukoŭcy vyjavili jašče adnu zakanamiernaść.
«My raskryli vielmi vyraznuju suviaź pamiž tym, jak mocna ludzi reahavali na pachi, i ich žadańniem mieć mocnaha lidara ci navat dyktatara, zdolnaha zadušvać radykalnyja pratesty i zabiaśpiečvać sacyjalnuju stabilnaść», — kaža Jonas Ołafsan, adzin z aŭtaraŭ daśledavańnia.
Imavierna, najaŭnaść padobnaj suviazi kaža pra toje, što schilnaść da aŭtarytaryzmu abo libieralizmu moža być bijałahična abumoŭlenaj i źviazanaj z tym, jak našy prodki prystasoŭvalisia da žyćcia ŭ vialikich hrupach sabie padobnych. Reakcyja ahidy, źviazanaja z pacham potu ci ekskrymientaŭ, mahła abaraniać ich ad epidemij i zaraznych chvarobaŭ.
U dalejšym hetaja reakcyja i źviazanyja ź joj emocyi raspaŭsiudzilisia na astatnija aśpiekty žyćcia čałavieka, u tym liku i na palityku. U najbližejšaj budučyni navukoŭcy płanujuć zrazumieć, jakija pachi mohuć padśviadoma prymušać čałavieka niehatyŭna stavicca da nośbitaŭ inšych idej, i daviedacca, ci možna pazbavicca hetaj reakcyi.
Kamientary