Siońnia staršynia Partyi BNF Lavon Barščeŭski i jahony namieśnik Viktar Ivaškievič padali zajaŭku ŭ harvykankam ab praviadzieńni tradycyjnaha žałobnaha šeścia na Dziady.
Hetym razam akcyja projdzie 2 listapada (niadziela) a 12:00 ad Uschodnich mohiłak. Udzielniki šeścia spačatku ŭskładuć kvietki da mahiłaŭ Vasila Bykava, Uładzimiera Karatkieviča, Hienadzia Karpienki, Michasia Tkačova, Pimiena Pančanki i inš. Paśla heta ludzi skirujucca vulicaj Kalinoŭskaha i Łahojskim traktam da Kurapataŭ.
Pavodle Lavona Barščeŭskaha, isnavała papiaredniaja damova ź lideram KCHP‑BNF Zianonam Paźniakom, što ŭdzielniki Dziadoŭ projduć tym samym maršrutam, što i 20 hadoŭ tamu. Adnak u apošni momant Paźniak, paśla nastojvańnia «mienskich kaleh», vykazaŭsia za maršrut apošnich hadoŭ, to bok ad hadzińnikavaha zavodu, što na Tałbuchina, da Kurapataŭ.
Barščeŭski vykazvaje spadziavańnie, što dźvie kalony ŭsio ž zmohuć złučycca. «Pamiać nielha dzialić, asabliva miž adnadumcami», — kaža paet Hienadź Buraŭkin.