U aŭtorak u haradach Rasiei adbuducca žałobnyja mierapryjemstvy. Pavodle versii śledztva, žurnalistka mahła bačyć svajho zabojcu ŭ tvar.
7 kastryčnika 2006 hodu ŭ Maskvie ŭ domie 8/12 pa Lasnoj vulicy była zabitaja viadomaja žurnalistka, ahladalnica «Novoj haziety» Hanna Palitkoŭskaja. Śledztva dahetul nie adšukała zamoŭcaŭ zabojstva. U červieni 2008 hodu śledztva było skončanaje, abvinavačvańni pradjavili byłomu supracoŭniku maskoŭskaj milicyi Siarhieju Chadžykurbanavu, padpałkoŭniku UFSB Paŭłu Rahuzavu, a taksama bratam Džabraiłu dy Ibrahimu Machmudavym. Rustam Machmudaŭ, jakoha ličać niepasrednym vykanaŭcam zabojstva, znachodzicca ŭ mižnarodnym vyšuku. Pavodle śledčych, žurnalistka mahła bačyć svajho zabojcu ŭ tvar, pra što śviedčyć zapis, zrobleny kameraj videanazirańnia.
Žurnalistka «Novoj haziety» Hanna Palitkoŭskaja viadomaja najpierš svaimi materyjałami na temu Čačni i Paŭnočnaha Kaŭkazu. Ad lipienia 1999 hodu jana šmat razoŭ vyjaždžała ŭ zony bajavych dziejańniaŭ i lahiery ŭciekačoŭ u Dahiestanie, a potym u Inhušecii dy Čačni. Aŭtarka dakumentalnaj knihi «Padarožža ŭ piekła. Čačenski dziońnik». Za seryju repartažaŭ z Čačni ŭ studzieni 2000 hodu Hanna Palitkoŭskaja była ŭhanaravanaja premijaj «Załatoje piaro Rasiei». Inšyja jejnyja premii: premija Sajuzu žurnalistaŭ RF «Dobry ŭčynak — dobraje serca», premija Sajuzu žurnalistaŭ za materyjały pa baraćbie z karupcyjaj, dyplom «Załaty honh‑2000» za seryju materyjałaŭ pra Čačniu.
