Vinšavańnie na Vialikdzień ad Aleha Butkieviča, biskupa Viciebskaha: Boh siarod nas!
Pavažanyja braty i siostry ŭ Chryście, darahija dyjacezijanie!
«Tady ŭvajšoŭ i druhi vučań, što prybieh pieršy da mahiły, ubačyŭ i pavieryŭ» (Jan 20,8). Pustaja mahiła, skručanyja pałotny i jašče žyvaja ŭ pamiaci padzieja Vialikaj Piatnicy pryviali apostałaŭ da viery va Uvaskrasieńnie. Ich śviedčańnie stvaraje siońnia padmurak našaj viery ŭ pieramohu Chrysta nad hrachom i śmierciu!
Radasnym «Aleluja» my znoŭ vyznajem praŭdu pra toje, što Jezus žyvie! Viartajučysia da Jevanhielskich padziej, my prahniem razam z apostałami pieražyć ich ździŭleńnie i radaść ad sustrečy z Uvaskrosłym Chrystom. Prajści pa darozie ŭ viosku Emaus, usłuchoŭvajučysia ŭ tłumačeńnie praroctvaŭ Śviatoha Pisańnia, razam z apostałam Piatrom zakinuć sieci ŭ voziera na słova Uvaskrosłaha Nastaŭnika, Jaki staić na bierazie i čakaje, kab nakarmić svaich vučniaŭ rybaj i chlebam. I, biezumoŭna ž, razam z apostałam Tamašam dakranucca da ranaŭ Zbaŭcy, vyznajučy, što jany naležać «…majmu Panu i majmu Bohu» (par. Jan 20,28).
Heta nie pavinny być tolki ŭspaminy. Uvaskrosły Jezus i siońnia prahnie iści z nami darohami našaha žyćcia, być dapamohaj i padtrymkaj u našaj pracy, tulić nas da Svajho Paranienaha Serca ŭ chviliny vyprabavańniaŭ i rospačy. Jon i nadalej prysutny siarod tych, chto Jaho šukaje, i nadalej prychodzić da nas u svaim Słovie, Sakramantach i ŭ inšym čałavieku. Bo jak Sam śćviardžaŭ, pavodle Jevanhielista Maćvieja: «…Voś Ja z vami va ŭsie dni, až da skančeńnia vieku» (Mc 28.20).
Žadaju vam, darahija braty i siostry, kab niaspynna pamiatali pra hetuju prysutnaść Uvaskrosłaha Zbaŭcy nie jak surovaha sudździ, a jak litaścivaha Siabra i Miłasernaha Ajca. Bo Jon viedaje ludskoje žyćcio, jaho pastki, niedachopy i sapsavanaść, a razam z tym viedaje, jak zrabić jaho lepšym. Niachaj dziakujučy takoj viery vaša radaść budzie poŭnaj, nadzieja tryvałaj, a luboŭ dziejsnaj!
Chrystos Uvaskros! Aleluja! Sa śviatam!
Božaha supakoju, śviatła i błasłaŭleńnia!
Biełaruskija siłaviki pryjechali zatrymlivać futbolnaha fanata na mašynie z rasijskimi numarami FOTAFAKT7
U Minsku prajšoŭ vajskovy parad dzietsadaŭcaŭ. Im kamandavaŭ chłopčyk u formie milicyi na elektramabili FOTA6
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka103
Kamientary