Vybary 2.0

Cikavaj akaličnaściu sioletnich vybaraŭ zrabiłasia ich medyjnaść. Faktyčna, heta byli vybary 2.0 — karystajučysia mabilnymi telefonami dy ličbavymi fotaaparatami, mnohija naziralniki zdoleli dapamahčy nam zazirnuć u zakulisy vybarčych učastkaŭ. Siabry vybarčych kamisijaŭ, jakija raniej byli biastvarymi vykanalnikami zahadaŭ pra jaŭku dy ŭdarnyja vyniki hałasavańnia, ciapier pieratvarylisia ŭ zorak vialikaha realici-šoŭ.

Voś, naprykład, čarhovaja padborka videa, jakaja źjaviłasia ŭ internecie. Kadry źniatyja adnym z naziralnikaŭ u Miensku, na ŭčastku, dzie balatavałasia Volha Kazulina.

«Kamisija robić vyhlad, što padličvaje hałasy, — kamentuje aŭtar videa. — Prytym naziralniki znachodziacca na adlehłaści, ź jakoj ničoha nie bačna, a niekatoryja siabry kamisii jašče i robiać «tancy» vakoł stała kab zamiest biuleteniaŭ my bačyli ich azadki». I sapraŭdy, na videa my bačym sapraŭdny baletny numar siabroŭ kamisii, jakija vykonvajuć «taniec maleńkich biuleteniaŭ»:

A voś videa, na jakim niezaležny naziralnik sprabuje sfatahrafavać biuleteni ŭ pracesie «padliku». Dziadźka z kamisii litaralna adpichvaje jaho, hrudźmi ŭstaŭšy na abaronu stała ź biuleteniami. Mužčyny tuzajucca amal što ŭ rytmie tanha:

U časie padlikaŭ hałasoŭ byvajuć i sapraŭdnyja dzivosy nakštałt azdaraŭleńnia chvorych — pazajzdrościŭ by navat Małachaŭ: «Nakolki vy viedajecie, siabram učastkovaj kamisii nie dazvalajecca vychodzić z pakoju padčas padliku hałasoŭ, — tłumačyć aŭtar videa. — Ale ž treba pazvanić načalstvu, kab daviedacca, jakija ž vyniki hałasavańnia treba ŭpisać u kančatkovy pratakoł. Dziela hetaha adna žančyna z kamisii symulavała prystup vysokaha cisku, pajšła z hetaj «nahody» ŭ susiedni pakoj, prytym astatnija siabry kamisii ŭ hety čas biaździejničali (mabyć mocna chvalavalisia za kalehu). Pa vyzdaraŭleńni «chvoraj», praz paru chvilinaŭ, padlik hałasoŭ byŭ chutka skončany i na ścianie źjaviŭsia pratakoł ź nievierahodnymi vynikami!»

I voś trahikamičny finał: USIE biuleteni skłali ŭ adzin pakunak!

Technalohija šparka kročyć napierad, ličbavyja videapryłady robiacca ŭsio tańniejšymi, a značycca nastupnyja prezidenckija vybary majuć usie šancy zrabicca sapraŭdnym hitom — dastatkova zabiaśpiečyć naziralnikaŭ ličbavymi fotaaparatami dy mabilnikami ź videakamerami, a taksama mahčymaściu zapampoŭvać videa ŭ sieciva. Choć paśmiajemsia.

• 0
• 0
• 0
• 0
• 0
• 0
• 0
• 0