Tydzień tamu adno z rasijskich PR-ahienctvaŭ prapanavała «Našaj Nivie» za ŭznaharodžvańnie raźmiaścić pradastaŭleny imi tekst, u jakim jak byccam by praŭdapadobna raskazvajecca pra ŭmovy budaŭnictva Niežynskaha rudnika pad Lubańniu — toj uzvodzicca siłami niamieckaha kancerna Deilmann-Haniel GmbH pa zamovie «Słaŭkalija» (naležyć rasijskamu miljarderu Michaiłu Huceryjevu).
«Da redakcyi źviarnuŭsia adzin z supracoŭnikaŭ (jon pažadaŭ zastacca nienazvanym) arhanizacyi, jakaja pracuje na budaŭnictvie rudnika i padzialiŭsia svaimi aściarohami pra źmiest zaklučanaj bakami damovy, — tak pačynajecca prapanavany da publikacyi tekst. — Akazałasia, kantrakt zaklučany takim čynam, što ŭ vypadku sprečki pa jaho asnoŭnych umovach u niemcaŭ zaŭsiody budzie pieravaha. Kopija kantrakta majecca ŭ rasparadžeńni redakcyi, i my možam tolki paćvierdzić dovady našaj krynicy: niezrazumieła, što prymusiła «Słavkalij» zaklučyć kantrakt na zahadzia nieraŭnapraŭnych umovach».
Niežynski horna-ŭzbahačalny kambinat.
Dalej u tekście śćviardžałasia, što «pradstaŭnikoŭ «Słaŭkalija» schilili da zaklučeńnia ŭhody karupcyjnymi mietadami», što Deilmann-Haniel GmbH «moža ŭčyniać avaryi i ničoha im za heta nie budzie» i hetak dalej.
Viadoma, što ni imia tajemnaha «supracoŭnika», ni dakumientaŭ, na jakija rabilisia spasyłki, nie było.
Tamu my zrabili vysnovu, što heta sproba manipulacyi hramadskaj dumkaj z boku niejkich biznes-kołaŭ, zacikaŭlenych u skasavańni kantraktu.
My źviarnulisia pa kamientar da kiraŭnika «Słaŭkalija» Michaiła Huceryjeva.
Toj ličyć, što list absalutna chłuślivy, bo pry zaklučeńni kantraktaŭ hałoŭnaj metaj «Słaŭkalija» było paśpiachovaje zaviaršeńnie budaŭnictva Niežynskaha kompleksu i vybar padradčyka z suśvietnym imiom.
«Chaču padkreślić: Deilmann-Haniel uvachodzić u lik viadučych kampanij u halinie hornaha budaŭnictva i tunelabudavańnia. Za 130 hadoŭ kampanija pabudavała bolš za 500 šachtavych stvałoŭ u takich krainach jak Hiermanija, Rasija, Kitaj, Ispanija. Druhi naš niamiecki partnior — Herrenknecht — najbujniejšy suśvietny vytvorca stvołaprachodnych kompleksaŭ, paśpiachova pracuje ŭ tym liku ŭ ZŠA i Kanadzie.
Raspracoŭka i ŭzhadnieńnie usiaho abjomu dakumientaŭ uzajemadziejańnia Deilmann-Haniel i «Słaŭkalija» — heta najskładaniejšy i praciahły praces, jaki patrabavaŭ detalovaha vyvučeńnia z boku inžynieraŭ, technołahaŭ, budaŭnikoŭ, jurystaŭ, mieniedžaraŭ. Vynikovy dakumient maksimalna ŭličvaŭ intaresy jak niamieckaha, tak i biełaruskaha boku. Siońnia Deilmann-Haniel vykonvaje svaje abaviazacielstvy pierad «Słaŭkalijem» u poŭnym abjomie, budaŭnictva Niežynskaha rudnika ažyćciaŭlajecca ŭ strohaj adpaviednaści z adviedzienymi terminami», — taki kamientar Huceryjeva atrymała «Naša Niva».
Ale kamu moža być vyhadny taki ŭkid?
Našy krynicy ŭ kalijnaj halinie miarkujuć, što situacyja moža być vyhadnaj kankurujučaj kampanii — «Urałkaliju».
«Urałkalij» viadzie zaciažnuju vajnu z Deilmann-Haniel, rychtuje suprać niamieckaj firmy pazoŭ i takim čynam moža imknucca stvaryć admoŭnaje «pablisici» kampanii ŭ miedyjaśfiery krain SND.
Adznačym, što prapanavany «Našaj Nivie» artykuł byŭ u vyniku apublikavany ŭ niekatorych rasijskich resursach (sa stylistyčnymi praŭkami, ale tymi ž samymi «faktami»).
