Stvaralnik botneta «Andramieda» pakłapaciŭsia pra toje, kab škodnasnaja prahrama nie atakavała biełarusaŭ. Pra heta raspavioŭ Alaksandr Machnač, śledčy pa asabliva važnych spravach upraŭleńnia pa rasśledavańni złačynstvaŭ suprać infarmacyjnaj biaśpieki i intelektualnaj ułasnaści Śledčaha kamiteta padčas Kanfierencyi IT Security 2018, paviedamlaje Tut.by.
— Sprava dosyć cikavaja, zajmaŭsia hetym biełarus, možna skazać, adzin sa staŭpoŭ ajčynnaha chakinhu, — raspavioŭ Alaksandr Machnač. — Vykarystoŭvałasia infarmacyja karparacyi Microsoft, jakaja ŭpieršyniu aficyjnym šlacham trapiła ŭ materyjały kryminalnaj spravy. Pa hetych dadzienych, štomiesiac adbyvałasia ad 3 da 4 miljonaŭ zaražeńniaŭ kampjutaraŭ pa ŭsim śviecie.
— Kali ekśpierty pravodzili analiz koda, kazali, što čałaviek, jaki heta napisaŭ — realny hienij. Pryčym pjany hienij, tamu što ćviarozy takoje nie napiša — takija tam byli chady.
Praca bota pačynałasia z taho, što jon praviaraŭ krainavuju prynaležnaść kampjutara — pa raskładcy kłavijatury. Kali raskładka była ruskaja, biełaruskaja, ukrainskaja abo kazachskaja, jon pierastavaŭ pracavać. Pra što ciapier hramadzianin i kaža: «Heta vialiki pakazčyk, ja dumaŭ, mnie zaličycca». Nu, napeŭna, zaličycca, — ź ironijaj adznačyŭ pradstaŭnik SK.
Nahadajem, udzielnika kibierzłačynnaj hrupoŭki zatrymali ŭ listapadzie 2017 hoda. Nad tym, kab spynić pracu «Andramiedy», pracavali Jeŭrapoł, FBR, pravaachoŭnyja orhany Hiermanii, Aŭstralii, Biełarusi, Kanady, Čarnahoryi, Sinhapura i Tajvania. Taksama dapamahali śpiecyjalisty z Microsoft i ESET.
