29 sakavika adbylisia sudy nad błohierami Alaksandram Kabanavym i Siarhiejem Piatruchinym, jakich zatrymali napiaredadni Dnia Voli, paviedamiŭ Tut.by pravaabaronca Raman Kiślak.
Sud Leninskaha rajona Bresta pryznaŭ Siarhieja Piatruchina vinavatym u niepadparadkavańni supracoŭniku orhanaŭ unutranych spraŭ i pryznačyŭ 45 bazavych vieličyń (1102,5 rubla) štrafu.
U Biarozie Alaksandra Kabanava pryznali vinavatym va ŭdziele ŭ niesankcyjanavanym masavym mierapryjemstvie paŭtorna na praciahu hoda i dali 40 bazavych (980 rubloŭ) štrafu.
Siarhieja Piatruchina zatrymali ŭviečary 23 sakavika ŭ Breście, a Kabanava — 24 sakavika ŭ Biarozie. Vychodnyja jany praviali ŭ izalatarach časovaha ŭtrymańnia. 26 sakavika padčas sudoŭ abodva zajavili chadajnictvy ab pradastaŭleńni advakata. Sudździ ich zadavolili, pryznačyli nastupnyja pasiadžeńni na 29 sakavika i vyzvalili błohieraŭ z-pad varty.
Błohiery Siarhiej Piatruchin i Alaksandr Kabanaŭ aśviatlajuć na svaim kanale ŭ YouTube pratesty vakoł budaŭnictva pad Brestam akumulatarnaha zavoda. U pryvatnaści, jany vykładvajuć spravazdačy ab sustrečach praciŭnikaŭ budaŭnictva pradpryjemstva, jakija z 25 lutaha kožnuju niadzielu sustrakajucca na płoščy Lenina ŭ Breście.
