Niekalki tysiač žycharoŭ Vałakałamsku ŭ čaćvier viečaram vyjšli na stychijnuju akcyju pratestu kala administracyi horada, patrabujučy ŭvieści režym nadzvyčajnaj situacyi ŭ rajonie i začynić śmiećcievy palihon «Jadrava». U vyniku ŭłady abviaścili tolki ab «pačatku pracedury ŭvodu NS».
Śmiećcievy palihon «Jadrava» raźmieščany ŭ niekalkich kiłamietrach ad Vałakałamsku. Žychary ŭžo hod skardziacca na niepryjemnyja pachi ŭ horadzie i rehularna vychodziać na mitynhi.
Pa dadzienych aktyvistaŭ, uviečary ŭ čaćvier da budynka administracyi pryjšli kala šaści tysiač čałaviek. Na videatranślacyi ź mitynhu čuvać, što jany skandavali: «Začynić!» i «NS!».
«Žychary nie vierać aficyjnym pakazčykam vykidaŭ sieravadarodu, jakija daje administracyja rajona. Žychary ŭpeŭnienyja, što pakazčyki pa vykidach sieravadarodu zanižajucca ŭładami: pa aficyjnych dadzienych, u noč ź sierady na čaćvier byli zafiksavanyja vykidy, jakija ŭ 10 razoŭ pieravyšajuć hranična dapuščalnuju kancentracyju, ale žychary vymierali pakazčyki vykidaŭ ułasnym pryboram, jaki zafiksavaŭ pieravyšeńnie kancentracyi sieravadarodu ŭ 87,5 razoŭ», — kaža adzin z pratestujučych.
Žychary horada bolš za hadzinu čakali, kali da ich vyjduć pradstaŭniki haradskich uład. U vyniku Andrej Vicharoŭ, jaki niadaŭna byŭ pryznačany vykonvajučym abaviazki kiraŭnika rajona, abviaściŭ, što ŭłady pačynajuć «praceduru ŭvodu nadzvyčajnaha stanovišča». «My zasiadali i pryniali rašeńnie. My pačynajem praceduru ŭvodu NS (…) zaŭtra my adpraŭlajem na kamisiju pa papiaredžańni i likvidacyi i paśla hetaha pačynajem praceduru», — skazaŭ Vicharoŭ.
«My vielmi hetaha chočam, my nastojvajem» — pres-sakratarka Łukašenki raskazała, ci pojdzie toj na nastupnyja vybary3
Kamientary