Intelekt ćvili, hodnaść travy i klasyfikacyja błochaŭ

U Harvardzkim universytecie (ZŠA) abjavili sioletnich laŭreataŭ Antynobeleŭskaj premii, viadomaj taksama jak Ihnobeleŭskaja abo Šnobeleŭskaja. Jaje štohod prysudžajuć za samyja niedarečnyja navukovyja dasiahnieńni j uručajuć u toj samy čas, što i Nobeleŭskuju.

Premija pa archiealohii

Navukoŭcy z San-Paŭlu raskryli padstupnuju rolu kratoŭ u historyi. Dakładniej, padkopnuju. Jany pafarbavali čarapki j zakapali ich u roznych miescach na adnoj dzialancy. Paśla puścili tudy raskašavać ziemlaryjku-branianosca (Euphractus sexcintus). Praz 2 miesiacy akazałasia, što ŭsie čarapki paznachodžanyja j papierasovanyja.

Premija pa bijalohii

Premija ŭ halinie bijalohii dastałasia trom navukoŭcam z Francyi, jakija vyśvietlili, što sabačyja błochi skačuć dalej za tych, što raskvataravalisia na katach. Kacinyja błochi skačuć ažno na 10 santymetraŭ bližej i na 2 santymetry nižej. Adnak navukoŭcy abnadzieili, što kali treba, błochi mohuć natreniravacca j palepšyć pakaźniki.

Premija pa kahnitalohii

Čaćviora japoncaŭ i adzin vuhorac vyśvietlili, što hrybkovaja ćvil moža rašać hałavałomki i prachodzić labirynty.

Premija pa litaratury

Prafesar teoryi menedžmentu Devid Syms ź biznesovaj škoły ŭ Londanie atrymaŭ uznaharodu za knihu «Ty, vybladak: karotki dośled lutavańnia ŭ arhanizacyjach», jakaja raspaviadaje pra abrazy, jakija cierpiać rabotniki ŭ kantorach, ofisach dy ŭstanovach. Vysnova, da jakoj prychodzić laŭreat: «Tak zvanyja vybladki dapamahajuć inšym adčuć siabie bolš-mienš narmalnymi ludźmi».

Premija pa medycynie

Amerykaniec z Paŭdniovaj Karaliny dakazaŭ, što darahija leki lepiej lečać. Jon razdaŭ dvum hrupam dobraachvotnikaŭ adny i tyja pihułki-pustyški, praŭda, ŭsim zmaniŭ, što heta novyja leki ad bolu. Adnym skazaŭ, što kaštujuć jany 10 centaŭ za pihułku, druhim — što dva z pałovaj dalara. Choć pihułki dastalisia «pacyjentam» zadarma, paśla daražejšych lekaŭ i sapraŭdy baleła mieniej, choć šnobeleŭski laŭreat pstrykaŭ usich adnolkavymi razradami toku.

Premija miru

Švajcarskaja federalnaja kamisija pa etycy ŭ bijalohii vypuściła dakument pad nazovam «Hodnaść žyvych istot prymianialna da raślinaŭ», u jakim pryjšła da vysnovy, što čynieńnie «advolnaje škody» raślinam «jość maralna niedapuščalnym». Niahledziačy na toje, što kasić travu ŭ Švajcaryi nie pierastali, ihnobeleŭski kamitet acaniŭ pryncypovuju pazycyju federalnaj kamisii.

Premija pa psychalohii

Dla svaich dośledaŭ navukoŭcam ź Ńju-Meksyka daviałosia pracavać pa načnych klubach. Kab vyśvietlić, ci bačna pa žančynach, što jany znachodziacca ŭ spryjalnaj dla začaćcia fazie, jany paprasili stryptyzeršaŭ dać spravazdačy pra svaje čajavyja ŭ tyja nočy, kali jany prymali harmanalnyja supraćzačatačnyja srodki, i kali znachodzilisia ŭ naturalnym stanie. Akazałasia, kali stryptyzeršy nie prymali pihułak, ichni zarobak byŭ značna bolšym.

Premija pa charčavańni

Daśledčyki ź Italii j Vialikabrytanii dakazali, što ježa tym lepš smakuje, čym lepš hučyć. Paddoślednym jany razdali adnolkavyja čypsy, ale adnoj hrupie načapili navušniki z «palepšanym» hukam chrumstu. Jedakam u navušnikach było smačniej! Hetak eksperymentalnym čynam było ŭstalavana, što ideał čypsaŭ musić chrumścieć jak najhučniej i lepš kab u dyjapazonie ad 2 da 20 kilahiercaŭ.

Premija pa chimii

Premiju pa chimii atrymali try harvardzkija daśledčyki ź labaratooryi pa kantroli za naradžalnaściu Medyčnaj škoły Harvardu. Imi było vyjaŭlena, što takija napoi jak «Koka-Koła» i «Pepsi» mohuć vykarystoŭvacca ŭ jakaści katraceptyvaŭ. Jany źmiašali roznyja šypučki z spermaj u prabirkach. Dyk voś ad dyjetyčaj Koły ŭsie spermatazoidy padochli ŭžo praz chvilinu, paśla «New Coke» 41% vyžyŭ. U Tajvani amerykacam nie pavieryli, zalili limanadami spermatazoidy nanova j zajavili, što ni Pepsi, ni Koła ad niespadziavanaj ciažarnaści nie ŭratujuć. Što ž, uhanaravali i tajvańcaŭ.

Premija pa fizycy

Amerykanskija navukoŭcy 3415 razoŭ strasianuli skryniu ź viaroŭkaj i narešcie dakazali, što viaroŭka, struna, vołas ci štoś padobnaje rana ci pozna musova skrucicca ŭ vuzieł.

Antynobeleŭskuju premiju ŭ 1991 hodzie zasnavaŭ časopis «Anały nievierahodnych daśledavańniaŭ» (Annals of Improbable Research), jana imhnienna stałasia papularnaj nia tolki siarod navukoŭcaŭ. Vystupleńnie kandydataŭ padčas cyrymonii musić doŭžycca nia bolš za chvilinu. Praz hety čas na scenu vychodzić dziaŭčynka j kaža: «Kali łaska, dosyć, mnie nudna». Laŭreatam uručali medal z falhi, plastykavyja skivicy, a sioleta — raździełačnyja doški.

• 0
• 0
• 0
• 0
• 0
• 0
• 0
• 0