Reakcyja ekśpiertaŭ na apublikavanyja pastanovy ŭrada, što rehulujuć vykanańnie dekreta pra darmajedstva, — rassłabon i zaspakajeńnie. Kštałtu: heta zhortvańnie nieadekvatu i ruch nazad. Bo darmajedaŭ strašać tolki «poŭnaj» kamunałkaj, a kamunałka nieŭzabavie budzie biezdatacyjnaj dla ŭsich, to ničoha strašnaha. Ale nie treba niedaaceńvać biezdań, u jakuju situacyja moža raźviarnucca voś ad hetaha, siońniašniaha, momantu.
Kali vyznačalnaj jość łohika, dyk z časoŭ uviadzieńnia «padatku na darmajedstva» ŭsio zrabiłasia tolki horaj. Bo da pasłuh ŽKH chutka mohuć dadacca inšyja, pakul nie raskrytyja vydatki — farmuloŭki ŭsich pastanovaŭ bolš čym ćmianyja, nie vierycie — pahladzicie sami. A voś pahroza nakiravańnia ŭ ŁTP za «asacyjalny vobraz žyćcia» — heta niešta pryncypova novaje. Raniej cana «vychadu» ź liku bad guys była davoli nizkaj, mienš za 200 dalaraŭ u hod.
Zaraz pry piesimistyčnym scenary ŭsio moža pieratvarycca va ŭzakonienaje rabaŭładańnie z abaviazkam źbirać pa palach kamiani pad nahladam kamisii z deputataŭ i BRSM; (BRSM — i «Biełaja Ruś» — dva prykłady «respublikanskich dziaržaŭna-hramadskich abjadnańniaŭ», jakija prychodziać mnie ŭ hałavu). To całkam zrazumieła, čamu na pieryjad zboru bazy dadzienaja kamanda nie ŭzdymać paniku i ŭdavać, što dziaržava amal asadziła nazad. Imavierna, paralelna z narychtoŭkaj indyvidualnych numaroŭ niebarak, jakija trapili ŭ «bazu darmajedaŭ», idzie skanavańnie hramadskaj reakcyi na pradmiet «prahłynuć — nie prahłynuć».
To vaźmu na siabie rabotu pa pieraliku łahičnych pazłaŭ, što ŭźnikajuć z novych pastanovaŭ. Mahčyma, niekamu va ŭradzie heta dapamoža nie vynachodzić paŭnočnakarejski rovar i viarnucca narešcie da suśvietnaj praktyki.
1. Čamu vy vyrašyli, što ludzi, jakija nie zdoleli znajści sabie stałaj pracy, prydbali papiarednie ŭ majomaść žytło, kamunałku na jakoje vy zaraz zadzieracie? Ci apłata aciapleńnia stanie poŭnaj nie tolki dla darmajedaŭ — ułaśnikaŭ kvater, ale i dla darmajedaŭ, prapisanych na žyłpłoščy? Ale karu musić nieści tolki parušalnik hramadskich norm, a nie jahonyja rodzičy. Tak było ź biblejskich časoŭ.
2. Jak być z darmajedami, jakija vyjechali z rajcentra, papracavali niekalki miesiacaŭ na zavodzie ŭ stalicy, padpali pad skaračeńnie i zdymajuć adnuchu na apošnija hrošy, sprabujučy pracaŭładkavacca? Jakuju «kamunałku» vy sabralisia im padvysić? Ź jakoj chaty? Toj, jakuju jany pakinuli ŭ rajcentry? Ci toj, dzie jany žyvuć? Kali apošniaje — dyk a ŭ čym vinavatyja haspadary?
3. Razhledzim samo paniaćcie «ludzi, jakija nie ŭdzielničajuć u finansavańni ekanomiki». Biespracoŭnyja prosta nie płaciać padatkaŭ. Dziaržaŭnyja słužboŭcy, jakija raspracoŭvali hetyja novyja papiery i aznačeńni, — płaciać. Ale padatki, jakija płaciać dziaržaŭnyja słužboŭcy, biarucca ź biudžetnych hrošaj, uziatych z padatkaŭ inšych ludziej. Jak i zarobki biudžetnikaŭ. Skaraciŭšy słužboŭca, adzinaj pracaj jakoha jość kantrol nad biespracoŭnymi ŭ kamisii, ty nie tolki stvaraješ biespracoŭnaha, ale i ekanomiš vydatki, užo ŭniesienyja tymi, chto finansuje ekanomiku. Pieračytajcie hety punkt. Vam nie padajecca, što ŭsia hetaja badziaha z «ludźmi, što nie ŭdzielničajuć u ekanomicy», składajecca z hetkich voś paradoksaŭ?
4. Čałaviek, jaki zarabiŭ za hod miljon dalaraŭ i spłaciŭ ź ich sto tryccać tysiač padachodnaha padatku, zhodna z pastanovami moža nie pracavać tolki adzin kvartał. U «kvartale, nastupnym za kvartałam, u jaki adbyłosia zvalnieńnie», jon darmajed, što «nie ŭdzielničaje ŭ ekanomicy». Chacia pa ŭsich raskładach jahony «ŭdzieł u ekanomicy» roŭny 100 hadam udziełu ŭ ekanomicy zvyčajnaha hramadzianina. To treba było praduhledzieć kolkasnyja papraŭki? Bo ja ŭjaŭlaju sabie Biła Hiejtsa, jaki źbiraje pa palach kamiani ŭ kampanii kalinkavickich ałkaholikaŭ, i ruki maje češucca napisać pra heta antyŭtopiju.
5. Vierniemsia da «antysacyjalnaha ładu žyćcia», za jaki kamisii z pravieranych tavaryšaŭ majuć, zhodna z pastanovaj, prava «pryniać rašeńnie ab nakiravańni darmajeda ŭ lačebna-pracoŭny prafiłaktoryj». Pol Hahien vioŭ «antysacyjalny ład žyćcia» (i nie byŭ u tvorčym sajuzie!) Duboŭka, Hienijuš, Kupała i navat Karatkievič pry zaciatym, pychlivym pohladzie na ich pobyt mahli być raspaznanyja jak elemienty, schilnyja da «antysacyjalnaha žyćcia». Ich nie «lačyli» tolki tamu, što nie znajšłosia čalcoŭ BRSM, dastatkova zaniepakojenych «antysacyjalnaściu» pajmienavanych tvorcaŭ. Dyk ci možna delehavać takija zvyščałaviečyja paŭnamoctvy takim vypadkovym ludziam — z takimi niapeŭnymi farmuloŭkami? U krainie jość Kryminalny kodeks, jaki vyznačaje, za jakija dakładna złačynstvy i ŭ jakim paradku svabody čałavieka musiać abmiažoŭvacca. Bo prymusovaje lačeńnie — heta mienavita pra pakarańnie abmiežavańniem svabody. Dyk pry čym tut BRSM?
6. Jak być z tajamnicaj finansavaha žyćcia, da jakoj ciapier atrymlivajuć dostup nie padatkaviki (im i Boh skazaŭ viedać, chto, dzie, na jakija hrošy pracuje!) — ale całkam «cyvilnyja» dziadzi i cioci ŭ pinžakach?
7. Pakiet antydarmajedskich mier nie viadzie da stvareńnia novych pracoŭnych miescaŭ. Kolki b ni pužali narod novymi vydatkami, kali ŭ rajonie niama kudy pracaŭładkavacca, raboty bolej nie stanie. Budzie bolej tolki rospačy ad taho, jak spłacić za padaražałuju chatu.
8. Dysbałans pamiž tymi, chto pracuje, i tymi, chto siadzić na padatkovych vydatkach, budzie abjektyŭna tolki ŭzrastać pa miery padvyšeńnia siaredniaha ŭzrostu, vyklikanaha nie najlepšaj demahrafijaj. Chočacie vypravić hety dysbałans — zaachvočvajcie naradžalnaść ilhotami i vypłatami.
9. Čym musili b zajmacca «antydarmajedskija» kamisii kštałtu tych, jakija stvarajucca zhodna z pastanovami, — dyk heta nie razhladam taho, chto znachodzicca ŭ ciažkaj žyćciovaj situacyi, a razdačaj mikrakredytaŭ na zasnavańnie novych biźniesaŭ. Pryčym razdavać tyja kredyty varta było b nie darmajedam, a pradprymalnikam, jakija majuć vartyja ŭvahi biźnies-płany.
10. Kali ŭ dziaržavy niama hrošaj na toje, kab nieści ciažar sacyjalnych vydatkaŭ na zvyčajnym uzroŭni, łahična było b zrabić dźvie rečy na vybar: a) skaracić vydatki b) spahnać hrošy z tych, u kaho jany jość. Antydarmajedskaje zakanadaŭstva stvaraje dadatkovuju patrebu ŭ novych vydatkach na kamisii (kali nie hrašovych — dyk vydatkaŭ pa časie). Da taho ž jano šukaje hrošy tam, dzie ich niama.
Zakanadaŭstva składajecca z paradoksaŭ tolki ŭ apovieściach Franca Kafki. U astatnich suśvietach jano musić padparadkoŭvacca łohicy.
Kamientary