«Piekin pakazvaje, što Biełaruś — pryvilejavany partnior»: ekśpiert pra niezvyčajny trochdzionny vizit ministra abarony Kitaja

Adnym ź pieršych vizitaŭ novaha ministra abarony Kitaja Vej Fenche staŭ prylot u Biełaruś — jon byŭ tut try dni, z 5 pa 8 krasavika, mieŭ sustrečy z vyšejšym kamandavańniem Biełarusi. 

Asabliva intryhujuča hučała farmuloŭka damovy, padpisanaj bakami pa vynikach sustrečy — kitajski ministr paabiacaŭ Biełarusi «biazvypłatnuju vajennuju dapamohu». 

Pavialičyć

Pra što tut moža iści havorka? 

U pres-słužbie viedamstva kažuć, što nie majuć čaho dadać da ŭžo apublikavanaj raspłyvistaj infarmacyi. 

Ale na hetu temu dla «Našaj Nivy» vykazaŭsia vajskovy ekśpiert Alaksandr Alesin. 

«Zvyčajna takaja dapamoha ŭjaŭlaje saboj nielatalnyja srodki, — kaža Alesin. — Byli ŭžo vypadki, kali kitajcy daryli nam abstalavańnie dla pieralivańnia kryvi, inšuju techniku dla špitalaŭ. Daryli aŭtamabili pavyšanaj prachodnaści «Drakon», daryli paru branievikoŭ i, vidać, zrobiać niejkaje dapaŭnieńnie da hetych padarunkaŭ, bo niejak abiacali 30 aŭtamabilaŭ dla adnoj z rot SSA». 

Alesin upeŭnieny, što ni pra jaki altruizm tut kazać nie vypadaje. 

«Jak kazaŭ eks-kiraŭnik našaha VPK Huruloŭ, kitajcy ničoha prosta tak nie robiać — paŭsiul raźlik i taktyka. Sprava ŭ tym, što za časam sankcyj Kitaj atrymaŭ šmat vajennych i kaśmičnych technałohij savieckaha pachodžańnia mienavita praź Biełaruś. Navat Rasija tady nie vielmi achvotna dzialiłasia, bo siabravała z ZŠA. Tyja ž srodki aptyčnaha zandavańnia Ziamli, srodki naviadzieńnia, ciahačy — usio heta Kitaj atrymaŭ ad nas. Vidavočna, što jany spadziajucca i nadalej na našyja zavody VPK, na našy instytuty i prahramistaŭ, jakija mahli b padzialicca niejkimi svaimi napracoŭkami i sistemami kiravańnia. Mnie zdajecca, što takija vizity i padarunki — heta takaja zajaŭka na praciah supracoŭnictva ŭ halinie vajennych technałohij. Chaj niekatoryja ŭ Rasii kažuć, što Kitaj z nas užo ŭsio vysmaktaŭ, ale vidavočna, što heta nie tak», — skazaŭ ekśpiert. 

Taksama Alesin dumaje, što takija ščylnyja suviazi niervujuć Rasiju. 

«Rasija chacieła b manapalizavać svoj upłyŭ na Biełaruś. Joj nie padabajucca blizkija kantakty Biełarusi ź inšymi krainami. Tym bolš, u hetaj situacyi Biełaruś zaručajecca padtrymkaj ŭpłyvovaha siabra Rady biaśpieki AAN, što hipatetyčna zvužaje lubyja nie zusim zdarovyja, moža być, płany Rasii na hety rehijon — Kitaj pakazvaje, što Biełaruś — heta jaho pryvilejavany partnior, na jakim zaviazany intaresy. Z druhoha boku, Rasija nie dzielicca z nami svaimi technałohijami, i nie źbirajecca hetaha rabić. Tamu łahična, što tyja ž rakiety my chočam atrymać ad Kitaja. Pakul Rasija nie hatovaja vykazvać niezadavolenaść publična, dekłaravać takija nastroi paklikany prydziaržaŭnyja ekśpierty, jakija ŭžo vykazvajucca ŭ takim kirunku», — padsumavaŭ jon. 

• 0
• 0
• 0
• 0
• 0
• 0
• 0
• 0