Reuters.com
U Barsiełonie na adnoj z centralnych vulic — praśpiekcie Paralel — adbyłasia masavaja akcyja pratestu, u jakoj, pa dadzienych miascovaj palicyi, pryniali ŭdzieł 315 tys. čałaviek, pieradaje hazieta El Pais. Udzielniki šeścia, jak udakładniaje La Vanguardia, vystupali pad łozunham «Za pravy i svabody, demakratyju i zhurtavanaść». «Chočam, kab vy byli doma!» — hučała taksama na mitynhu.
Demanstranty patrabavali ad ispanskich uładaŭ adklikać ordery na aryšt, vyzvalić i dazvolić viarnucca na radzimu ŭsim katałonskim palitykam, jakija znachodziacca ŭ papiarednim źniavoleńni pa abvinavačvańniach, źviazanych z praviadzieńniem niezakonnaha refierendumu ab niezaležnaści.
U akcyi, jak zaŭvažaje El Pais, pryniali ŭdzieł u tym liku aktyvisty płatformy «Demakratyja i suisnavańnie». Hetaja arhanizacyja, jak udakładniaje vydańnie, była stvorana niadaŭna, adnak u jaje ŭžo paśpieli ŭvajści dziasiatki palityčnych i hramadskich arhanizacyj, u tym liku nacyjanalistyčnaja «Katałonskaja nacyjanalnaja asambleja», niekamiercyjnaja arhanizacyja Òmnium Cultural, stvoranaja dla prasoŭvańnia katałonskaj movy i raspaŭsiudžvańnia katałonskaj kultury, a taksama prafsajuzy «Rabočyja kamisii» i «Usieahulny sajuz pracoŭnych».
Mitynh u Barsiełonie adbyŭsia roŭna praz šeść miesiacaŭ paśla aryštu lidara arhanizacyi «Katałonskaja nacyjanalnaja asambleja» Žordzi Sančesa (u momant źmiaščeńnia jaho pad vartu jon taksama byŭ abrany ŭ katałonski parłamient) i kiraŭnika Òmnium Cultural Žordzi Kuisarta. Usiaho ž na dadzieny momant u madrydskich turmach pa abvinavačvańni ŭ dačynieńni da arhanizacyi refierendumu ab niezaležnaści Katałonii znachodziacca dzieviać palitykaŭ. Taksama ispanski sud vydaŭ mižnarodnyja ordary na aryšt jašče šaści palityčnych dziejačaŭ Katałonii, jakija ŭ znachodziacca za miežami krainy.
Pad vartu Madryd choča zaklučyć u tym liku byłoha kiraŭnika ŭrada Katałonii Karlesa Pučdemona. Jon zaraz znachodzicca ŭ Hiermanii.
