Alaksandr Łukašenka padčas štohadovaha pasłańnia da narodu i parłamienta źviarnuŭ uvahu, što Biełaruś nie vykarystoŭvaje ŭ naležnaj miery svoj hieahrafičny patencyjał.
«Heta niedaravalnaje marnatraŭstva. Čamu našym hramadzianam bolš vyhadna lotać adkul zaŭhodna — ź Vilni, Kijeva, Varšavy, — ale nie ź Minska? Kali Biełaruś stanie pa-sapraŭdnamu pryvabnym vuzłom? Urad pavinien u hetym hodzie pakłaści mnie na stoł dakumient, jaki prymusić śviet ubačyć Biełaruś i z hetaj pazicyi», — daručyŭ jon.
«Naša Niva» pahladzieła niekalki papularnych kirunkaŭ dla biznesa i turyzma, kudy mohuć latać našy ludzi, i paraŭnała ceny. U jakaści prykładaŭ byli abranyja Barsiełona, Paryž, Stakholm, Stambuł, Maskva, Astana i Dubaj.
U pieralotach ź Minska my brali ceny «Biełavija», jakoje źjaŭlajecca najbujniejšym pavietranym pieravozčykam na našym rynku.
Varta adznačyć, što brałasia pad uvahu ahulnaja cana kvitka z ulikam usich zboraŭ.
Sa stalic susiednich dziaržavaŭ lotajuć łaŭkosty (samyja papularnyja — Ryanair i Wizzair), jakija vystaŭlajuć minimalnuju canu, ale za roznyja pasłuhi, jak bahaž, davodzicca dapłočvać asobna.
Varta taksama adznačyć, što łaŭkosty časta lotajuć nie ŭ asnoŭnyja aeraporty haradoŭ, a ŭ bolš addalenyja, ź jakich dabiracca našmat ciažej. Skažam, kab dabracca z aeraporta Paryža-Buvie da stalicy Francyi, treba addać amal 20 jeŭra na aŭtobus.
Pry hetym usio adno najčaściej vychodzić bolš tanna lacieć mienavita ź Vilni ci Varšavy, a nie ź Minska.
Vychodzić, što istotna tańniej ź Minska latać tolki ŭ Maskvu. Prykładna adnolkavyja ceny na Kazachstan. A voś u Jeŭropu vyhadna lotać ź Vilni i Varšavy.
U našych tablicach dla paraŭnańnia bralisia ceny na maj tudy-nazad, kab prabyć u horadzie 5-8 dzion.
Z Kijeva da Maskvy niama pramych rejsaŭ.
