Usiaho patrochu 7 7

Kaciaryna Karpickaja, fota Voli Aficeravaj

13.05.2018 / 12:46

Kimano-transformier, dyvanok dla johi i inšyja lubimyja rečy Kaciaryny Sakovič

Zapuskajem na «Ninie» novuju rubryku «Piać rečaŭ». U joj biełarusy roznych prafiesij i cikaŭnaściaŭ buduć dzialicca naboram svaich lubimych rečaŭ, jakija b jany abaviazkova zabrali z saboj pry apieratyŭnym pierasialeńni i bieź jakich słaba ŭjaŭlajuć svajo žyćcio, bo jany robiać jaho bolš kamfortnym.

Pieršaja hierainia — dyrektarka rekłamnaha ahienctva getbob agency Kaciaryna Sakovič.

— Kali rychtavałasia, ja spytała ŭ bojfrenda, jakija ž rečy samyja nieabchodnyja dla mianie? Jon adkazaŭ prosta: «Nu, majtki, stanik…». Bazavyja, karaciej. Ja ž chutčej budu zachoŭvać niejkija dziŭnyja, darahija rečy, čym štodzionnyja. U hetym ja čymści padobnaja charaktaram na babulu, jakaja, kali my žyli ŭ Taškiencie, padčas ziemlatrusu ŭ pieršuju čarhu vyniesła z kvatery darahuju sercu kitajskuju vazu.

Z adnaho boku, ja sprabuju racyjanalna padychodzić da zakupaŭ (tak, kaśmietyki ŭ mianie minimum, a ŭsio niepatrebnaje ja adrazu razdaju na svop-viečarynach). Ź inšaha — vielmi ciažka nie akružać siabie pryjemnymi štukami.

Fotaaparat z historyjaj

Heta moj dziciačy aparat. Baćki padaryli jaho hod u 13, i z tych časoŭ ja pastajanna brała jaho va ŭsie vandroŭki: u Rumyniju, Bałharyju i hetak dalej. Zusim niadaŭna vyśvietliłasia, što heta supiermodny, chipstarski fotaaparat. Kali maje siabry ŭbačyli, što jon u mianie jość, zapisalisia ŭ čarhu na karystańnie.

Ź plonkaj samaje pryjemnaje — heta čakańnie taho, što atrymajecca ŭ vyniku. Letaś my jeździli ŭ Ispaniju. Tam ja ažyćciaviła daŭniuju maru: pakatacca na kabryjalecie. Ja ŭjaŭlała heta jak scenu z kino, kali vałasy raźviejvajucca pa vietry i voś heta ŭsio. Kaniečnie, chaciełasia zachavać momant na fota. Praŭda, kali prajaviła plonku z toj pajezdki, ubačyła, što ŭsie kadry nie ŭ fokusie, razmytyja. Ale, na dziva, mienavita jany nabrali bolš za ŭsio reakcyj, kali ja vykłała ich u sacsietki. Mabyć, ludziam padabajecca takaja voś niedaskanałaść momantu.

Dyvanok dla dyjałohu z saboj

Niadaŭna z chłopcam my trapili na joha-retryt (niešta kštałtu łahiera johi) u Tajłandzie i vielmi natchnilisia hetaj temaj. Vyrašyli pačać zajmacca johaj doma: tak možna hladzieć roznyja praktykavańni i abirać, što bolš padabajecca.

Pieršapačatkova hety dyvanok ja padaryła chłopcu, u mianie byŭ svoj. Ale paśla my pamianialisia. Sprava ŭ tym, što upryhožvaje jaho repradukcyja amierykanskaj mastački Ashley Mary, jakaja mnie vielmi padabajecca. Ja na jaje ŭ instahramie padpisanaja. Jaho možna vykarystoŭvać i dla ciopłaj johi pry tempieratury 40 hradusaŭ: u łaźni, naprykład. Adčuvańnie takoje, nibyta ty na plažy, cieła hrejecca.

Raniej mnie zdavałasia, što joha — heta sumna, ale ciapier ja ŭsprymaju jaje jak karysnuju miedytacyju. Asobna my chodzim zajmacca sportam i tam inšy temp, nahruzki. Ranicaj ža, pierad pracaj, chacia b try razy na tydzień kładziemsia na dyvanki i raściahvajemsia, nastrojvajemsia na pracoŭny pazityŭny dzień.

Dla mianie heta čas, jaki atrymlivajecca pravieści sam-nasam z saboj. Kali nie treba, narešcie, kudyści biehčy i śpiašacca.

Krem-uniseks dla ruk

Adnojčy pra hety krem mnie raskazaŭ bojfrend, i ŭžo hod piać my nabyvajem jaho paŭsiul, dzie bačym. U Biełarusi časta suchoje i vietranaje nadvorje, skura sochnie. My mažam hetym kremam i ruki, i nohi, i kalenki pry patrebie: jon vielmi kruta ŭvilhatniaje. U vandroŭki amal nijakuju kaśmietyku nie biarom. A jaho — abaviazkova.

Krem typu z marychuanaj i pachnie, nibyta pałyn. Heta taki nie papsovy pach i ŭniseks: to bok, padychodzić i chłopčykam, i dziaŭčynkam. My padsadzili na jaho ŭsich znajomych siabroŭ.

Čaraviki — abjekt mastactva

Ja daŭno chacieła mienavita hetyja biełyja čaraviki, ale ŭsio nie mahła zrazumieć, jak ich lepš zakazać z Amieryki. A zimoj u adnoj błohierki ŭbačyła, što joj pryjechali takija samyja, ale pamier nie padyšoŭ. Zatoje hety 41-y z pałovaj padyšoŭ mnie.

Ja ŭsio bajałasia nasić ich u brud i choład, čakała dobraha nadvorja. I voś pryjšła viasna. A za joj amal adrazu leta. Tak što čaraviki ja amal nie panasiła.

Mnie vielmi padabajecca bieły koler na hety momant. Jon prosty, jak i čorny, ale apošni krychu paśpieŭ nadakučyć. U mianie jość padobnyja zimovyja boty, z futram, tolki karotkija. I jany prosta-taki pad usio padychodziać. Niejak na vyjaznoj kanfierencyi ja zrazumieła, što jany vydatna zamianili mnie niekalki par abutku: možna było nasić ich i pad džynsy, i pad sukienku, i na viečarynu… Heta vielmi zručna, kali reč moža vykonvać niekalki funkcyj.