Paśla ŭrahanu śmiarotnaść u Puerta-Ryka vyrasła na 62% i dasiahnuła 4 645 čałavieki, padličyli ŭ Harvardzie. Na dumku ekśpiertaŭ, hetych pamierłych varta adnosić da achviar urahanu, bo jany źviazany z razbureńniem infrastruktury vostrava.
Hrupa daśledčykaŭ praviała apytańnie žycharoŭ Puerta-Ryka — vyspy, na jakuju ŭ vieraśni 2017 hoda abrynuŭsia ŭrahan «Maryja», kab acanić nastupstvy stychijnaha biedstva. Praca apublikavanaja ŭ navukovym časopisie The New England Journal of Medicine, praviadzieńnie apytańnia spansavaŭ u tym liku miedycynski fakultet Harvardskaha univiersiteta.
Daśledčyki pryznajuć, što padličyć zahinułych paśla surjoznaj katastrofy ciažka. «Niahledziačy na toje što ŭrahan «Maryja» nanios značny ŭron infrastruktury vostrava, jaho ŭpłyŭ na śmiarotnaść zastajecca sprečnym», — havorycca ŭ pracy. Aficyjna zahinułymi ad nastupstvaŭ urahanu ličacca 64 čałavieki.
Dla praviadzieńnia niezaležnaj acenki śmiarotnaści ad usich pryčyn paśla ŭrahanu (z 20 vieraśnia pa 31 śniežnia) daśledčyki apytali 3299 vypadkova vybranych chatnich haspadarak u Puerta-Ryka. Vyśvietliłasia, što za hety pieryjad pamierli 4645 čałaviek, rost śmiarotnaści ŭ paraŭnańni ź minułym hodam skłaŭ 62%. «Uzrovień śmiarotnaści zastavaŭsia vysokim da kanca śniežnia 2017 hoda, a tracina ŭsich śmierciaŭ była źviazana z zatrymkaj abo pieraryvańniem akazańnia miedycynskaj dapamohi», - adznačajecca ŭ pracy.
Kamientary