Arcybiskup Kandrusievič pra pozvy sieminarystam: «Niezrazumieła, chto za hetym staić i čamu heta było zroblena»
Katalickich i pravasłaŭnych sieminarystaŭ nie zabiaruć u vojska hetaj viasnoj. Jak my ŭžo paviedamlałasia, adterminoŭka budzie dziejničać da lutaha 2019 hoda. U kamientaryi dla Catholic.by arcybiskup Tadevuš Kandrusievič nazvaŭ hetu situacyju «dziŭnaj i niezrazumiełaj».
— Ja nie viedaju nivodnaj krainy, dzie małady śviatar ci sieminaryst padčas vučoby pryzyvaŭsia b u vojska. Raskazać kamu z zamiežnych biskupaŭ — va ŭsich tolki ździŭleńnie.
Ciapier chaču najpierš padziakavać Prezidentu Biełarusi za padpisany Ukaz ab pradastaŭleńni adterminoŭki. Kanfierencyja biskupaŭ źviartałasia da prezidenta z takoj prośbaj. I ja vieryŭ da kanca, što situacyja vyrašycca.
U mianie zastałosia tolki adno niezrazumiełaje pytańnie, na jakoje nie viedaju dzie šukać adkaz.
Pryzyŭ adbyvajecca dva razy na hod — vosieńniu i viasnoj. Dakumienty z prośbaj ad adterminoŭcy my padajom adzin raz — zvyčajna ŭ kancy leta, kab paśpieć da asieńniaha pryzyvu.
Tak my zrabili i letaś. I ŭ vajenkamaty minułaj vosieńniu nikoha nie vyklikali. Nivodzin śviatar ci sieminaryst pryzyŭnoha ŭzrostu pozvu tady nie atrymaŭ. A tut niečakana atrymlivajuć. U čym sprava? Biurakratyčnyja chiby? Hublajusia ŭ dahadkach.
Rasparadžeńnie prezidenta ab adterminoŭcy zvyčajna adno na dva pryzyvy. Čamu tady minułaj vosieńniu nikoha nie klikali? Dziejničaje ž adno i toje rasparadžeńnie.
Z časoŭ adradžeńnia struktur Katalickaha Kaścioła takich precedentaŭ ja nie pamiataju. Niezrazumieła, chto za hetym staić i čamu heta było zroblena.
Heta ž stvaraje dla krainy admoŭny imidž! Pra hety vypadak pišuć zamiežnyja ŚMI — mnie telefanavali žurnalisty ź Italii, Hiermanii. Što ja moh skazać? My nie majem adkazu.
Zaraz u vajenkamatach raspaŭsiudzili infarmacyju pra adterminoŭku da lutaha. Ale ci heta sapraŭdy tak, my nie viedajem. My nie atrymali nijakaha dakumienta, jaki pra heta b havaryŭ. Čamu? Nieviadoma. My pišam prośbu i padajem śpisy sieminarystaŭ, ale kančatkovaha dakumienta nie atrymlivajem.
Kali b kožny sieminaryst ci śviatar pryzyŭnoha ŭzrostu mieŭ taki dakumient, to byŭ by spakojny, viedajučy, da jakoha času jon nie budzie pryzvany.
Pravasłaŭnaja Carkva sutyknułasia z takoj ža situacyjaj. Kala dvuch tydniaŭ razam z pradstaŭnikami roznych vieravyznańniaŭ my sustrakalisia va Upaŭnavažanaha pa spravach relihij i nacyjanalnaściej.
Sustreča datyčyła temy dziaržaŭnaha pryznańnia našych sieminaryj. Jany zarehistravanyja jak vyšejšyja navučalnyja ŭstanovy, ale ŭsio adno nie majuć takoha statusa. Kali b jon byŭ, to pytańnie z pryzyvam padčas navučańnia adpadała b aŭtamatyčna.
Kamientary