Bił Klintan u suaŭtarstvie sa znakamitym piśmieńnikam Džejmsam Patersanam vypuściŭ palityčny raman, padziei jakoha raźvivajucca ŭ časy jaho znachodžańnia ŭ Biełym domie. Raman nazyvajecca «President is Missing» («Prezident źnik»), i pa im užo zdymajuć sieryjał.
Heta pieršy vypadak, kali były prezident ZŠA stanovicca aŭtaram vostrasiužetnaha ramana.
«Ja lublu trylery, — skazaŭ eks-prezident ZŠA ŭ intervju Bi-bi-si. — Ja čytaju ich u vielizarnaj kolkaści. Voś tolki što skončyŭ treciuju knihu ŭ tryłohii «Čyrvony vierabiej» [Džejsana Mecijusa]».
Jon taksama skazaŭ, što jon fanat Patersana i prahłynuŭ załpam ŭsie jaho 25 knih pra psichołaha-detektyva Aleksa Krosa.
«Ja asabliva nie zachaplaŭsia kryminalnymi i vostrasiužetnymi ramanami da pačatku 1980-ch, a potym całkam pahruziŭsia ŭ ich», - skazaŭ Klintan, abrany na pasadu prezidenta ŭ 1992 hodzie i što prabyŭ na joj dva terminy.
Z tych časoŭ jon, pavodle jaho słoŭ, pieściŭ maru napisać ułasnuju knihu. «Ja zaŭsiody hetaha chacieŭ», - skazaŭ jon.
Siužet razhortvajecca vakoł kibierataki na ZŠA, jakaja pahražaje ŭsiamu śvietu. Jaje pavinien praduchilić hałoŭny hieroj — vydumany prezident Džonatan Linkaln Dankien. Pa miery taho jak raźvivajucca padziei, i času zastajecca ŭsio mienš, hałoŭny hieroj źnikaje.
Jak kaža Klintan, u knizie padrabiazna apisany detali žyćcia ŭ Biełym domie. Ad boŭlinha ŭ padvale da biehavych darožak u spalni prezidenta — «my sapraŭdy pastaralisia apisać heta jak maha bolš dakładna», kaža Klintan.
Praca prezidenta — mahčyma, samaja ciažkaja ŭ śviecie, pryznajecca Klintan.
«Ja chaču, kab čytačy ŭbačyli, što heta realnyja ludzi, jakija robiać realnuju pracu. Jany prymajuć rašeńni. I ich rašeńni ŭpłyvajuć na vaša žyćcio», - skazaŭ Klintan Bi-bi-si.
Raman «Prezident źnik» taksama źjavicca ŭ vyhladzie sieryjała, bujnaja kabielnaja sietka Showtime nabyła pravy na ekranizacyju i ŭžo prystupiła da zdymki epizodaŭ. Sieryjał vyjdzie ŭ nastupnym hodzie.
Kamientary