7 červienia ŭ Minsku adbudziecca raźvitalny kancert hurta Tonqixod — pieramožcaŭ uznaharod Experty.by 2018 u naminacyi «Lepšy albom hoda». Tonqixod nazyvajuć praryvam u biełaruskaj muzycy i lidar «Kramy» Ihar Varaškievič, i ekanamist Siarhiej Čały, i piśmieńnik Alhierd Bacharevič, i kulturołah Maksim Žbankoŭ.
Tonqixod — art-rokavaje trya ź Minsku, na rachunku jakoha dva studyjnyja albomy («Pradmova» 2014, «Koler, jakoha niama» 2017) i rekordnyja dzieviać uznaharod Experty.by pa hałasach biełaruskich i zamiežnych žurnalistaŭ. Muzyki taksama pieramahali ŭ konkursnaj prahramie «Basovišča», na cyrymonijach «Dajom rady» ad «Jeŭraradyjo» i «Hieroi hodu» ad TuzinFM.
Kalektyŭ abviaściŭ pra prypynieńnie dziejnaści ŭvosień 2017, ale vyrašyŭ sabracca dziela vystupu ŭ Minsku z nahody pieramohi na ŭznaharodach Experty.by. Dapamahli jamu ŭ hetym dadatkovyja pryzy: rekłamna-infarmacyjnaja padtrymka solnaha kancerta ad Finlandia (za «Lepšy albom hoda») i fondu «Viartańnie» (za «Lepšy biełaruskamoŭny albom»).
Ihar Varaškievič: «Tonqixod uraziŭ mianie, jak nivodny biełaruski hurt za apošnija hady. Ja dahetul nie razumieju, jak jany dadumalisia hrać takuju składanuju muzyku dy j jašče z takimi niezvyčajnymi i mudrahielistymi tekstami. Da taho ž z takoj lohkaściu. Heta kachańnie ź pieršaha prasłuchoŭvańnia! Vielmi raju schadzić na kancert, ale spadziajusia, što jon nie apošni».
Siarhiej Čały: «Z majho punktu hledžańnia Tonqixod — heta najlepšy hurt biełaruskaj muzyki. Ja palubiŭ ich tvorčaść ź pieršych ža hukaŭ, jak čałaviek, jaki vychoŭvaŭsia na anhlijskim i niamieckim art-roku pieršaj pałovy 1970-ch. Niemahčyma nie paznać tyja matyvy, jakija vy tam pačujecie: Jethro Tull, Gentle Giant, Genesis, Yes. A taksama kraŭt-rok Can i Amon Duul ź Niamieččyny. Heta była ŭnikalnaja padzieja dla biełaruskaj muzyki, vielmi raju naviedać apošni kancert».
Alhierd Bacharevič: «U 2013-m hodzie ja viarnuŭsia z Hamburha ŭ Biełaruś i Jula Cimafiejeva zaprasiła mianie schadzić na kancert hurta Tonqixod u «Hrafici». Ja byŭ nastolki pryjemna ŭražany, što na fonie voś hetaj druhasnaj biełaruskaj muzyki — a jana praŭda ŭ bolšaści vypadkaŭ dastatkova druhasnaja — Tonqixod hrali niešta svajo, vielmi aryhinalnaje, vielmi hłybokaje. Z taho času ja prychilnik tvorčaści hetych muzykaŭ. Jość u hetym sapraŭdny talent, sapraŭdnaja mahija».
Maksim Žbankoŭ: «Tonqixod — najlepšaje z taho, što zdaryłasia ź biełaruskaj muzykaj ciaham apošnich hadoŭ. Dziorzki, drajvovy i da taho ž absalutna estecki (post)art-rok — padobnaha ŭ nas nie było. A ciapier jość. Heta treba bačyć».
TONQIXOD z prahramaj «Šach i mat»
7 červienia — kłub «Bruhie» (pr. Partyzanski 6a) — 20.00
Kvitki: 15 rub. (tancplac), 20 rub. (siadziačyja).
Prodaž: Bezkassira.by
Infalinija: (33) 661 14 32
PRAŹMIERNAJE ŬŽYVAŃNIE AŁKAHOLU ŠKODZIĆ ZDAROŬJU
Kamientary