Byłaja seks-rabotnica Katryn Chili, jakaja damahłasia dekryminalizacyi prastytucyi ŭ Novaj Ziełandyi, stała kavaleram Ordena Zasłuh i atrymała tytuł damy — ekvivalent mužčynskaha tytuła «ser».
62-hadovaja Chili atrymała rycarski tytuł u paniadziełak. Jon uručajecca za asablivyja zasłuhi pierad krainaj albo za vydatnyja dasiahnieńni ŭ prafiesijnaj dziejnaści.
«Ja była vielmi ździŭlenaja, kali mnie skazali, što ja stanu damaj, — skazała jana ŭ intervju Bi-bi-si. — Ja była prosta ŭ šoku».
«Jašče niekalki tydniaŭ tamu ja b ličyła, što takoje niemahčyma. Heta pakazvaje na toje, jak źmianiłasia hramadskaja dumka, i prosta vydatna adčuvać takuju padtrymku», — dadała Chili.
U 1980-ja hady Katryn Chili była školnaj nastaŭnicaj, a zatym zaniałasia prastytucyjaj. Pavodle jaje słoŭ jana była ŭzrušanaja tym, što ŭ seks-rabotnic nie było nijakich pravoŭ z punktu hledžańnia zakanadaŭstva. Za čas pracy ŭ škole jana pryvykła da abarony z boku jak prafsajuzaŭ, tak i zakona.
«Pra nas, maładych seks-rabotnic, vykazvalisia vielmi niepavažliva. Nam treba było damahčysia taho, kab naš hołas byŭ pačuty, i kab ludzi zrazumieli naša stanovišča», — raspaviadaje Chili.
U 1987 Katryn Chili stvaryła arhanizacyju pad nazvaj «Novaziełandski kalektyŭ prastytutak» (NZPC), jakaja vystupała ŭ abaronu pravoŭ seks-rabotnic.
NZPC prymała ŭdzieł u raspracoŭcy tekstu zakona ab reformie prastytucyi, pryniataha ŭ 2003 hodzie, a Chili kaardynavała pracoŭnuju hrupu pa napisańni prajekta reformy. Paśla reformy bardeli ŭ Novaj Ziełandyi stali lehalnym biznesam. Zhodna z zakanadaŭstvam, na prastytutak raspaŭsiudžvajecca zvyčajnaje pracoŭnaje prava, a taksama praviły biaśpieki na pracoŭnym miescy.
Katryn Chili kaža, što fakt prysudžeńnia joj tytuła damy vielmi važny, ale praca pa abaronie seks-rabotnikaŭ jašče nie skončana. Hety rod dziejnaści ŭsio jašče ličycca haniebnym, ličyć jana.
«Ja dumaju, što astatnija krainy pavinny ŭziać prykład Novaj Ziełandyi. Nielha adkidvać prastytutak i rabić ich pracu bolš niebiaśpiečnaj», — kaža Chili.
Tytuły rycaraŭ i dam u Novaj Ziełandyi zaćviardžajucca karalevaj Lizavietaj II na asnovie rekamiendacyi premjer-ministra krainy.
Kamientary