Haspadar skandalnaha restarana ŭ Kurapatach — 54-hadovy biznesmien Leanid Zajdes

U centry ŭvahi hramadstva zastajecca restaran «Pajedziem, pajadzim» (raniejšaja płanavanaja nazva «Bulbaš-Choł»), jaki dniami adkryŭsia pobač ź miescam masavych rasstrełaŭ u Kurapatach. Aktyvisty praciahvajuć biesterminovuju akcyju pratestu la ŭvachoda va ŭstanovu.

«Naša Niva» sabrała jurydyčnuju infarmacyju, datyčnuju restarana, źjaŭleńnie jakoha vyklikaŭ skandał.

Terytoryja, jakuju zajmaje restaran, ahułam składaje 1,2 hiektara. Ad kanca 2007 hoda płošču ŭziała ŭ arendu kampanija «BiełRestInviest». Ziamla brałasia ŭ dva etapy, damova dziejničaje da 30 kastryčnika 2106 hoda. Za arendu ziamli kampanija płacić $1401,66 na hod. Štomiesiac heta mienš za $117.

Što takoje «BiełRestInviest»? U kampanii try zasnavalniki:

1. Sumiesnaje tavarystva z abiežavanaj adkaznaściu «KvartałMZS» (Biełaruś) — 50%
2. Kampanija z abmiežavanaj adkaznaściu Lenton Rieałci ŁŁS (ZŠA) — 33,3%
3. Zakrytaja akcyjaniernaja kampanija z abmiežavanaj adkaznaściu Biłsi Inviestmients Limited (Kipr) — 16,7%.

Takim čynam, restaran staić na terytoryi, jakuju aranduje biełaruska-amierykanska-kiprskaja kampanija «BiełRestInviest». Adnak zajmajecca dziejnaściu hetaha restarana inšaja kampanija, tavarystva z abmiežavanaj adkaznaściu «Amiźbieł».

Jano było stvorana hod tamu i całkam naležyć tavarystvu z abmiežavanaj adkaznaściu «Biełnavateks hrup». Heta kampanija, u svaju čarhu, maje nastupnych zasnavalnikaŭ:

1. Hramadzianin Biełarusi Leanid Zajdes (32%)
2. Hramadzianka Izraila Alina (Ała) Surys (24,5%)
3. Kampanija z abmiežavanaj adkaznaściu Lenton Rieałci ŁŁS (ZŠA) — 29%
4. Zakrytaja akcyjaniernaja kampanija z abmiežavanaj adkaznaściu Biłsi Inviestmients Limited (Kipr) — 14,5%.

Jak bačna, nazvy zamiežnych kampanij, jakija byli zasnavalnikami «BiełRestInviest» i «Biełnavateks hrup» supadajuć.

Najbolšuju dolu ŭ restaranie «Pajedziem, pajadzim» maje 54-hadovy Leanid Zajdes.

Na jaho staroncy ŭ fejsbuku ŭ jakaści miesca pachodžańnia paznačany Słuck.

Biznesmien žyvie ŭ katedžnym pasiołku na vulicy Kalcova ŭ Minsku. Padyści da jaho doma niemahčyma — pasiołak znachodzicca pad achovaj i zakryty dla naviednikaŭ.

Pavialičyć

Pavodle infarmacyi Ej.by, pradprymalnik źjaŭlajecca adnym z suŭładalnikaŭ «Našaj restarannaj hrupy». U hety biznes uvachodziać elitnyja restarany «Hrand Kuršaviel» i TheView.

Źviartaje na siabie ŭvahu, što Zajdes maje śpiecyfičny intares da słova «bulbaš». «Bulbaš-choł» — nie adzinaja jaho fantazija. U 2015 hodzie biznesmien mieŭ dačynieńnie da adkryćcia «Bulbaš-plaža» na bierazie Zasłaŭskaha vadaschovišča. Praz hod jaho pierajmienavali.

• 0
• 0
• 0
• 0
• 0
• 0
• 1
• 0