Na staroncy pieršaha namieśnika kiraŭnika Administracyi prezidenta Maksima Ryžankova 11 červienia źjaviŭsia dopis i fota lista na imia kiraŭnika Administracyi prezidenta Rasii Antona Vajno za podpisam Natalli Kačanavaj. U liście «ad imia prezidenta Biełarusi Alaksandra Łukašenki vykazvajucca prabačeńni rasijskim kaleham za arhanizavanyja nami miery suprać Rasijskaj Fiederacyi ŭ halinie infarmacyjnaj biaśpieki», piša Jeŭraradyjo.
Jak paviedamiŭ Jeŭraradyjo pieršy namieśnik kiraŭnika Administracyi prezidenta Biełarusi Maksim Ryžankoŭ, hety dopis ŭ «Tvitary» jon nie rabiŭ, a takoha lista za podpisam Natalli Kačanavaj nie isnuje.
«Usio, što tam apublikavanaje, nie adpaviadaje rečaisnaści. I kamientavać tut niama čaho, bo ŭzłamanaja staronka i ŭzłamanaja maja elektronnaja pošta. Usio, što tam ciapier raspaŭsiudžvajecca, — heta ŭsio pravakacyja. Tym bolš, kali vy pahladzicie, to ŭbačycie, što apošnim časam ja ŭ hetym akaŭncie nijakich dziejańniaŭ nie rabiŭ».
Sapraŭdy, apošni dopis u «Tvitary» Maksim Ryžankoŭ zrabiŭ u 2016 hodzie, i da kanca traŭnia 2018 hoda svaim akaŭtam nie karystaŭsia.
Pasiadžeńnie Vyšejšaha Dziaržaŭnaha Savieta Sajuznaj dziaržavy, pra jakoje idzie havorka ŭ liście, projdzie ŭ Minsku 19 červienia.
Admietna, što hety dopis na staroncy Maksima Ryžankova źjaviŭsia napiaredadni razhladu ŭ Viarchoŭnym sudzie Biełarusi apielacyi pa «spravie Rehnuma» — jana pryznačanaja na 12 červienia. Dzień, na jaki prypadaje śviatkavańnie Dnia Rasii.