Minski płanietaryj źbiraje hrošy na novaje abstalavańnie praz kraŭdfandynh. Što prapanuje naŭzamien?
Minski płanietaryj užo dva tydni źbiraje hrošy na čatyry novyja prajektary dla pakazu ŭnikalnych śfieryčnych filmaŭ, jakija zaraz demanstrujucca na vielmi sastarełym abstalavańni.
Na momant napisańnia artykuła 75 čałaviek praz talaka.by užo achviaravali bolš za 2000 rubloŭ z 12 300 nieabchodnych, što składaje ŭsiaho 16% ad mety. Da zakančeńnia kampanii zastałosia 48 dzion.
«Technałohija «poŭnaha kupała» padobnaja na IMAX. Ale, u adroźnieńnie ad IMAX, ekran našmat bolšy, jon raźmiaščajecca źvierchu i za vami ŭ 360 dzivosnych hradusaŭ», — raspaviadajecca ŭ apisańni kampanii.
Achviaravać možna roznyja sumy — ad 3 da 5000 rubloŭ, a naŭzamien arhanizatary abiacajuć padarunkavyja siertyfikaty na naviedvańnie pakazaŭ, kłubnyja kartki na ceły hod i brendavańnie płanietaryja za samyja bujnyja achviaravańni. Dazvolać navat jeści pop-korn padčas sieansaŭ (zvyčajna heta zabaroniena).
Minski płanietaryj adčyniŭ svaje dźviery ŭ dalokim 1965 hodzie. Zornaja zała, jakaja źmiaščaje 120 hledačoŭ, maje kupałapadobny ekran i śpiecyjalnaje abstalavańnie dla prajecyravańnia zornaha nieba i śfieryčnych filmaŭ. A ŭ šaścimietrovaj viežy absiervatoryi ŭstalavany teleskop Carl Zeiss z pavieličeńniem u 300 razoŭ.
Pry ŭmovach jasnaha nadvorja kožny achvotny moža absalutna biaspłatna panazirać tut za plamami na Soncy, pabačyć Miesiac ź jahonymi kratarami i harami, a taksama Vienieru, Mars, Jupiter, Saturn, dvajnyja i kratnyja sistemy zorak, charakternyja tumannaści i blizkija hałaktyki. Ščyryja supracoŭniki z zadavalnieńniem raspaviadajuć pra asablivaści ŭsich kaśmičnych abjektaŭ i adkazvajuć na lubyja pytańni.
Rehularna tut pravodziacca navukova-papularnyja lekcyi pra kosmas. Naprykład, niadaŭna raspaviadali pra astranamičnyja źjavy ŭ letapisach i chronikach Vialikaha Kniastva Litoŭskaha.
Za anonsami biaspłatnych padziejaŭ možna sačyć na sajcie absiervatoryi i ŭ supołkach płanietaryja ŭ sacsietkach.
«Nikomu nie kaža, čyj syn». Jak u Piekinie vučycca Kola Łukašenka3
Kamientary