Pačaŭsia nabor zajavak na premiju imia Natalli Arsieńnievaj — uhanarujuć najlepšuju paetyčnuju knihu minułaha hoda
Naminavać knihi možna da 10 lipienia.
Litaraturnaja premija imia Natalli Arsieńnievaj ušanoŭvaje aŭtara ci aŭtarku najlepšaj paetyčnaj knihi na biełaruskaj movie. Arhanizatary premii — Biełaruski PEN-centr, Sajuz biełaruskich piśmieńnikaŭ i Zhurtavańnie biełarusaŭ śvietu «Baćkaŭščyna». Uznaharoda ŭručajecca pry padtrymcy Fonda kultury i adukacyi Orsa-Ramana i Charytatyŭnaha fonda Zhurtavańnia biełarusaŭ Vialikaj Brytanii.
U skład žury premii sioleta ŭvachodziać:
- Anatol Ivaščanka, paet, litaraturaznaŭca;
- Volha Ipatava, piśmieńnica, pierakładčyca;
- Nasta Kudasava, paetka;
- Dźmitryj Strocaŭ, paet;
- Andrej Chadanovič, paet, pierakładčyk.
Pravam naminavańnia vałodajuć vydaŭcy, tvorčyja abjadnańni, arhkamitet Premii, siabry žury i sami aŭtary.
Udzielničać u sioletnim konkursie mohuć paetyčnyja knihi, napisanyja na biełaruskaj movie i vydadzienyja ŭ elektronnym ci papiarovym vyhladzie ŭ 2017 hodzie.
Zajaŭka pavinna ŭtrymlivać nastupnyja źviestki:
a) infarmacyja pra naminatara, što vyłučaje tvor na Premiju: kantaktnyja numary telefonaŭ i adrasy;
b) nazva knihi, vydaviectva, miesca i hod vydańnia;
v) imia (imiony) paeta/paetki, pa mahčymaści kantaktnyja dadzienyja;
h) elektronnyja pdf-viersii vydańniaŭ i, kali kniha vydavałasia ŭ papiarovym vyhladzie, minimum dva papiarovyja asobniki knih. Papiarovyja asobniki prymajucca pa adrasie Sajuza biełaruskich piśmieńnikaŭ (Minsk, vuł. Kuźmy Čornaha, 31-906), elektronnyja varyjanty — na adras: [email protected].
Zajaŭki prymajucca da 10 lipienia.
Premija zasnavanaja ŭ honar biełaruskaj paetki Natalli Arsieńnievaj (1903—1997) u 2017 hodzie i ŭručajecca za najlepšuju paetyčnuju knihu na biełaruskaj movie. Sioleta premija adbudziecca ŭžo druhi raz. Pieršym łaŭreatam premii staŭ Uładzimir Niaklajeŭ za zbornik paezii «Tolki vieršy».
Premija ŭručajecca pry padtrymcy Fonda kultury i adukacyi Orsa-Ramana i Charytatyŭnaha fonda Zhurtavańnia biełarusaŭ Vialikaj Brytanii, arhanizatary premii imia Natalli Arsieńnievaj — Biełaruski PEN-centr, Sajuz biełaruskich piśmieńnikaŭ i Zhurtavańnie «Baćkaŭščyna».
Sačyć za abnaŭleńniami možna na staroncy premii ŭ FB.
Kamientary