Učora, 21 červienia, stała viadoma, što aryštavany błohier z Kalinkavič Vital Mańko pačaŭ haładoŭku ŭ SIZA.
Mańko zatrymali napačatku leta pa padazreńni ŭ arhanizacyi finansavaj piramidy «Eleŭrus».
«Pa infarmacyi KDK, arhanizatary piramidy ŭvodzili ŭ zman hramadzian, pierakonvajučy ich u pierśpiektyvie ŭkładańnia hrošaj i abiacajučy vysoki prybytak ciaham doŭhaha času», — paviedamlaje viedamstva.
Praŭda, Mańko jašče i mieŭ svoj jutub-kanał, kudy zalivaŭ videa z krytykaj milicyi i čynoŭnikaŭ — nie tolki biełaruskich, ale i rasijskich.
Mańko byŭ davoli zaŭvažnaj asobaj u Kalinkavičach, jon pisaŭ mnostva zvarotaŭ u siłavyja orhany, sprabavaŭ padłavić ich na supiarečnaściach, naŭprost vajavaŭ u svaich videa z asobnymi aficerami.
Prahlady tam byli nie toje kab vielmi vialikija — pa niekalki tysiač. Ale kali ŭličyć, što videa ŭ asnoŭnym hladzieli žychary Mazyra, Lelčyc i Kalinkavič, to heta ŭsio ž nie mała.
Niekatoryja pačali ličyć, što zatrymańnie Mańko źviazana ź jaho publičnaj dziejnaściu, a finansavaja piramida — heta tolki nahoda izalavać vostraha błohiera.
Tak, u abaronu hetaha čałavieka Pavał Sieviaryniec pravioŭ pres-kanfierencyju, tam vystupiła i žonka zatrymanaha.
«Heta nie naš aktyvist, — patłumačyŭ «Našaj Nivie» Sieviaryniec. — Ale mianie paprasili dapamahčy Kastuś Žukoŭski (žurnalist «Biełsata» — NN) i Roza Strelčanka (deputatka Kaplickaha sielsavieta ŭ Kalinkavickim rajonie — NN). Tam situacyja takaja: u 2015 hodzie Mańko sapraŭdy ŭdzielničaŭ u tavarystvie «Eleŭrus», ale vyjšaŭ ź jaho, tak kaža žonka. Tady im nijakich pretenzij nie pradjaŭlali. A ŭ 2017 hodzie, na chvali pratestaŭ niedarmajedaŭ, jon pačaŭ rabić antykarupcyjnyja roliki, — adnaho milicyjanta navat zvolnili paśla vykryćcia, — i jamu abvieścili viendetu».
«Z kamunalnikami taksama tam ludzi vajavali, Mańko im dapamahaŭ. Słovam, šmat błohierskaj pracy zrabiŭ. Žonka kaža, što ŭsie mahčymyja pracesualnyja normy parušajucca, navat asadku z papieraj nie dajuć. Jana kaža, što muž byŭ tolki šarahovym udzielnikam toj piramidy. Jaho źniščajuć za vostryja roliki, jon — heta mazyrski Filipovič», — dadaŭ Sieviaryniec.
Ale ci nie kryvadušać svajaki Mańko, kažučy, što jon byŭ šarahovym udzielnikam finansavaj piramidy «Eleŭrus»?
«Naša Niva» znajšła ŭ internecie niekalki paŭtarahadzinnych rolikaŭ-«sieminaraŭ» z roznych haradoŭ Biełarusi, dzie Mańko ŭ jakaści asnoŭnaha śpikiera harodzić płot ź lebiady pierad naiŭnymi słuchačami, u asnoŭnym, piensijnaha vieku.
Jon sam raskazvaje, što źjaŭlajecca kiraŭnikom struktury ŭ Biełarusi, i tłumačyć, jak pracuje schiema.
Mańko apielavaŭ da ciažkaha ekanamičnaha stanovišča ŭ krainie i kazaŭ, što ŭzajemadapamohaj ludzi mohuć palepšyć svoj dabrabyt.
«Havaryć budziem pra realnuju dapamohu ludziam, — kaža jon u adnym videa. — Na siońnia ja nie ździŭlu vas, što prostyja ludzi ŭ finansavych tupikach, u Biełarusi 90% ludziej vyžyvajuć, ledź zvodziać kancy z kancami. A «Eleŭrus»… Tam ludzi, jakija dasiahnuli ranhu «chraniciela», realna stanoviacca finansava svabodnymi ludźmi».
«Heta kali ŭ ciabie try miljony prybytku, to ty nie viedaješ, kudy ich padzieć, bo na ŭsio treba. A kali ŭ ciabie značna bolš, to taksama nie viedaješ, takaja ironija. Z vami my zakładziem padmurak na mnohija hady supracoŭnictva. Hrošy budziem pieraličvać kožny paniadziełak, vy pavinny kazać znajomym, što jość takaja tema, na jakoj možna zarablać. Treba budzie pryvodzić siudy ludziej, pakazvać, što heta ŭsio praŭda», — raskazvaŭ jon taksama, dadajučy razvahi pra «misiju kožnaha ŭ hetym śviecie».
Pryčyna «sychodu» Mańko z arhanizacyi ŭ 2015 hodzie davoli prazaičnaja — burbałka piramidy prosta łopnuła, hrošaj nie chapiła na vypłatu ŭsim udzielnikam.
Zrešty, i rabotu piramida pačała ŭ tym ža 2015-m.
Adzinaje, što vyklikaje pytańnie — dyk heta sapraŭdy toj fakt, što piramida abrynułasia jašče try hady tamu, a zatrymali jaho tolki ciapier.
Praŭda, zvyčajna arhanizatary kormiać abiacańniami padmanutych ludziej jašče doŭhi čas pierad tym, jak tyja zrazumiejuć padman i źviernucca ŭ orhany.
Mańko i jaho kampańjony, jak miarkuje śledstva, atrymali 400 tysiač rubloŭ dachodu. Jamu pahražaje štraf albo pazbaŭleńnie svabody na termin ad 2 da 7 hadoŭ.
