Parłamienckija i prezidenckija vybary, što prajšli ŭ Turcyi 24 červienia, stali pieramohaj demakratyi, zajaviŭ u zvarocie da prychilnikaŭ u Ankary Redžep Taip Erdahan. Za padtrymku svajoj kandydatury na vybarach jon padziakavaŭ hramadzianam krainy i Ałachu, paabiacaŭšy Turcyi «hady roskvitu».
Da svaich prychilnikaŭ jon źviarnuŭsia z bałkona štab-kvatery kirujučaj Partyi spraviadlivaści i raźvićcia, jakaja taksama nabrała bolšaść hałasoŭ. Erdahan zajaviŭ, što pieramožcami stali ŭsie hramadzianie 81-miljonnaj Turcyi. «Pieramožcami vybaraŭ 24 červienia stała Turcyja, tureckaja nacyja, pakutniki našaj relihii i ŭsie pryhniečanyja ŭ śviecie … Ja słaŭlu Ałacha ŭ hety dzień», — źviarnuŭsia jon da prysutnych na płoščy. Adzinstva suhramadzian jon vykazaŭ słovami «adna nacyja, adzin ściah, adna radzima, adna dziaržava».
Asobnuju padziaku jon vykazaŭ ultrapravaj Partyi nacyjanalistyčnaha ruchu, jakaja akazała jamu padtrymku naroŭni z uznačalenaj Erdahanam Partyjaj spraviadlivaści i raźvićcia. Erdahan padkreśliŭ, što maje namier praciahnuć baraćbu z terarystami, siarod jakich jon zhadaŭ Rabočuju partyju Kurdystana i apazicyjny ruch FETO, jaki ŭznačalvaje prapaviednik Fietchuła Hiulen.
Kamientary