Jak amierykanskija biełarusy śviatkavali Kupalle FOTY
23 červienia biełarusy ź Ńju-Jorka i susiednich štataŭ sabralisia ŭ parku kala miastečka Kros-Ryvier, kab supolna adśviatkavać staražytnaje biełaruskaje śviata Kupalle.
Amierykanskija biełarusy ładziać Kupalle ŭžo daloka nie pieršy hod, ale sioleta da arhanizacyi śviata pryčynilisia viadomyja svaim tvorčym padychodam i ŭmieńniem vydatna padrychtavać i pravieści mierapryjemstva Hanna Šarko i Alaksandr Mazhavy ź siabrami-aktyvistami z hrupy ŭ fejsbuku «Biełarusy ZŠA. Razam lahčej». Tamu sioletniaje Kupalle adbyłosia ŭ pašyranym farmacie i płanavałasia jak aktyŭny adpačynak na praciahu abodvuch vychadnych dzion. U dadatkovaj prahramie byli futboł, valejboł, urok biełaruskaj movy, hulnia «Pošuk paparać-kvietki» pa ŭzoru bolš viadomaj hulni «Pošuk skarbaŭ», spartyŭnaja estafieta ź intryhujučaj nazvaj «Bitva kniastvaŭ» i inšyja zaniatki. Valancina Jakimovič pryviezła svaju vialikuju kalekcyju vyšyvanych biełaruskich kašul i strojaŭ dla tych, u kaho nie było svajoj tradycyjnaj vopratki.
Takim čynam, kala vohnišča ŭsie ŭdzielniki śviatkavańnia byli apranutyja ŭ sapraŭdnyja biełaruskija vyšyvanyja kašuli i sukienki. Lena i Piotr Ryžyja padrychtvali admysłovy kupalski napoj, zavarany na 27-i roznych ziołkach — Krupnik. Pierad tym, jak Kupališ i Kupalinka raspalili vohnišča, Valancina Jakimovič raspaviała pra značeńnie śviata letniaha soncastajańnia - Kupalla dla našych prodkaŭ, pra Kupalskija mietafary i simalizm u kupalskich śpievach i hulniach. Śpievy kala vohnišča, karahody i hulni prachodzili pad kiraŭnictvam Valanciny Jakimovič i Leny Ryžaj. Na sioletnim Kupalli było šmat žadajučych skoknuć praz vohnišča, trymajučy dziaŭčynu za ruku. A paśla apoŭnačy zarhanizavałasia vialikaja hrupa žadajučych pajechać na susiedniaje voziera, kab akunucca ŭ vadu ŭ čaroŭnuju kupalskuju noč. Jość nadzieja, što Kupalle dapamoža ŭ zachavańni biełaruskich tradycyj i ŭ macavańni biełaruskaj hramady ŭ Amierycy.
U padrychtoŭcy i praviadzieńni śviata taksama ŭdzielničali siamja Aleny i Juryja Kavalčukoŭ i Biełaruska-amierykanskaje zhurtavańnie «Pahonia».
Bolej fotazdymkaŭ možna pabačyć tut
Kamientary