Takoje rašeńnie pryniaŭ u paniadziełak Ekanamičny sud Bresckaj vobłaści padčas razhladu spravy ab abaronie dziełavoj reputacyi TAA «AjPauer». Hetaja kampanija viadzie budaŭnictva akumulatarnaha zavoda, i vystaviła pretenzii miascovym błohieram — Alaksandru Kabanavu i Siarhieju Piatruchinu.
Pavodle rašeńnia suda, błohiery pavinny buduć zapłacić pa 245 rubloŭ kožny. Akramia taho, jany pavinny vydalić sa svajho Youtube-kanała «Narodny reparcior» rolik pad nazvaj «Śviniec — Brestu pisiec?», zapisać prabačeńni i taksama vykłaści ich na hetym kanale.
Pazoŭ u sud na błohieraŭ byŭ padadzieny firmaj «AjPauer» za samy pieršy rolik pra budaŭnictva akumulatarnaha zavoda. U zajavie havaryłasia, što ŭ videasiužecie vykładzieny źviestki, jakija nie adpaviadajuć rečaisnaści i haniać dziełavuju reputacyju TAA «AjPauer». Na dumku pazoŭnika, vykazvańni błohieraŭ u roliku ŭtrymlivajuć nieabhruntavanyja abvinavačvańni kampanii ŭ parušeńni joju zakanadaŭstva ŭ halinie ekałohii, zabrudžvańnia navakolnaha asiarodździa, karupcyi i inš.
«Varta adznačyć, što ŭ bolšaści z nazvanych vykazvańniaŭ aŭtary videarolika nie robiać ahavorak, što acenka dziejnaści TAA «AjPauer» nosić subjektyŭny charaktar i ŭjaŭlaje saboj tolki mierkavańnie aŭtaraŭ, — naadvarot, infarmacyja vykładajecca jak dakładnyja, ustanoŭlenyja fakty i pradstaŭlena ŭ formie abvinavačvańniaŭ», — adznačana ŭ pazovie.
Darečy, padčas papiaredniaha sudovaha pasiadžeńnia było ahučana chadajnictva pazoŭnika zrabić praces zakrytym, kab zabiaśpiečyć kanfidencyjnaść źviestak, jakija tyčacca inviestycyjnaj dziejnaści TAA «AjPauer». Adnak sud nie znajšoŭ padstaŭ dla zadavalnieńnia hetaha chadajnictva.
Jak raspavioŭ Alaksandr Kabanaŭ, błohiery pakul nie płanujuć prasić prabačeńnia na svaim youtube-kanale i vydalać zhadanaje videa, jakoje nabrała bolš za 40 tysiač prahladaŭ. Jany źbirajucca abskardzić rašeńnie suda.
