Pra toje, čamu «ČP» usioj kamandaj źjechali ź Biełarusi tak i nie staŭšy čempijonami Vyšejšaj lihi, što trymaje ich u siońniašniaj Ukrainie i ci źbiarecca «ČP», kab adśviatkavać 20-hodździe svajoj kamandy, my pahutaryli z Alaksiejem Palakovym.
20 hod tamu kamanda «ČP» stała Čempijonami Biełaruskaha KVZ. Ale sapraŭdy pośpiech pryjšoŭ da ich krychu paźniej, kali chłopcy ź minskaj škoły № 130 pajechali skarać Vyšejšuju Lihu.
Kamanda «ČP». Źleva naprava: Siarhiej Atroščanka, Viktar Miadviedski, Anatol Čajkoŭski, Jaŭhien Smaryhin, Dźmitry Tankovič, Alaksiej Palakoŭ.
Vyšejšaja liha KVZ tak i nie skaryłasia, u 2005 hodzie z bronzavymi miedalami «ČP» syšli z KVZ. Zatoje i siońnia kamandu «ČP» pamiatajuć pa numarach «Pikavaja Dama», «Alesia», «Punsovyja vietrazi» ci, naprykład, pa žartach:
«— A čamu vy nie karystajeciesia zubnoj ščotkaj «Rich interdental», jana čyścić zuby i ŭ ciažkadastupnych miescach. — Vybačajusia, ale ŭ mianie niama zuboŭ u ciažkadastupnych miescach».
« — Tata, kupi piva! — Synok, adčapisia! — Nu kupi, tata, piva! — Adčapisia, kažu. — Nu tata, nu kupi piva, ja ž baču, jak tabie chranova»
« — A vy čuli, što Łukašenka ŭ luby momant moža syści ŭ adstaŭku? —Ty durań? — Pfff, hladzicie sami. Kanstytucyja RB. Artykuł 37. «Prezident u luby momant moža padać u adstaŭku».
Časy KVZ Alaksiej Palakoŭ uspaminaje ź ciepłynioj.
«Pa tych časach ja, viadoma, sumuju. Ale nie prama ŭžo da bolu ŭ hrudziach. Było lepiej, tamu što my maładymi byli. Zatoje dziakujučy KVZ ja vyznačyŭsia z tym, čym chaču zajmacca ŭ žyćci».
Na pytańnie, čamu ž «ČP» tak i nie stali čempijonami, Alaksiej adkazaŭ:
«My nie stali čempijonami vyški, tamu što stamilisia. Voś tak prosta hučyć adkaz. Zanadta vysoki temp byŭ uziaty ŭ pačatku siezona. Treba było prosta pierazahruzicca ŭ niejki momant. Nie viedaju. Prosta nie pisać miesiac, prosta źjechać kudyści. A my pisali ŭvieś hod i voś tabie vynik — pierahareli. Niechta, mahčyma, skaža što nas źlili. Była i takaja viersija. Nam sapraŭdy stavili pałki ŭ koły, ale kali b my byli ŭ vydatnaj formie, to hetyja pałki my prosta pierałamali b i nie zaŭvažyli».
Ad 2007 hoda Alaksiej Palakoŭ, jak i amal usie «čpšniki» žyvie va Ukrainie.
«Paśla zaviaršeńnia karjery ŭ KVZ, va Ukrainu pierajechali my ŭsie. Było šmat prapanovaŭ, dzie žyć i pracavać, u tym liku i Maskva. Ale my ŭsio vybrali Ukrainu. U 2007 hodzie jana nam zdałasia, i da hetaha času zdajecca, aptymalnaj krainaj dla pražyvańnia z tych krain, jakija my razhladali. Ludzi tut dobryja, umovy dla taho, kab budavać karjeru, dobryja, telebačańnie raźvitaje».
Usioj kamandaj pryjšli padtrymać Ivana Vabiščeviča na ŭkrainskim šou śpievaŭ «Ch -faktar».
U Biełaruś nie viartajusia tamu, što nie chaču ŭsio žyćcio pisać scenary dla viasiellaŭ i karparatyvaŭ
Za 10 hod žyćcia va Ukrainie ŭ Alaksieja, zrešty, jak i ŭ sukamandnikaŭ, źjavilisia siemji i dzieci.
«Amal va ŭsich žonki — ukrainki», — udakładniaje Alaksiej.
Tamu viartacca ŭ Biełaruś jon nie płanuje.
«Ja vielmi palubiŭ Ukrainu za hety čas. Chaj jana navat časam supiarečlivaja, niachaj jana miescami niespakojnaja, niachaj jana navat časam niepradkazalnaja, ale jana žyvaja. Jana sapraŭdnaja. Jana raźvivajecca, jana imkniecca da mety i meta hetaja zrazumiełaja. Meta hetaja bačnaja. A što ja budu rabić u Biełarusi? Ja nie viedaju. Ja nie chaču da kanca žyćcia pisać scenary dla viasiellaŭ i karparatyvaŭ. Ja zdolny na bolšaje, a ŭ Biełarusi takoj mahčymaści ŭ mianie na žal niama. Biełaruś — jana dobraja, ale jana jak lecišča, na jakoje možna pryjazdžać adpačyvać, a žyć i pracavać usie ž treba ŭ horadzie. U maim vypadku — va Ukrainie. Heta tolki majo mierkavańnie».
Alaksiej piša scenaryi da sieryjałaŭ, pradziusiruje ich. Adzin z abaviazkaŭ — adsočvać novyja humarystyčnyja šou, być u kursie taho, što ciapier vyklikaje śmiech u hledača.
«Humar mianiajecca, a mnie vielmi chočacca zastavacca ŭ abojmie, a nie stanavicca naftalinam. Ciapier amal štodzień źjaŭlajecca vielmi šmat humarystyčnych prajektaŭ usiudy: va Ukrainie, Rasii, u inšych krainach ALE nie ŭ Biełarusi. Mnie vielmi škada, što tak adbyvajecca. I talenavityja ludzi jość, ale niama televizara, niama finansavańnia. A kali hetaha ŭsiaho niama, to adkul uziacca jakasnamu kankurentazdolnamu kantentu? Pravilna niama adkul».
Z kalehami pa «Vaviorka pradakšn» Dźmitryjem Tankovičam i Paŭłam Kryŭčykam.
Siońnia Alaksiej Palakoŭ zaniaty ŭ piaci sieryjałach, i havorki pra toje, ci źbiarucca «ČP» razam, kab adśviatkavać jubilej čempijonstva, navat nie idzie.
«I nie tamu što my nie siabrujem adzin z adnym, nie, a tamu što vielmi šmat pracy. Kab dobra padrychtavać jubilejny kancert, patrebien minimum miesiac. Heta raskoša dla nas. Na miesiac adyści ad spraŭ. A spravy šmat: u dadzieny momant, va Ukrainie idzie rost sieryjalnaj vytvorčaści, a heta značyć što my pa vušy zaviazanyja ŭ hetym pracesie».
Čym zaraz zajmajucca druhija hulcy «ČP»
Jaŭhien Smaryhin. Akcior. Zdymajecca ŭ humarystyčnych sieryjałach, udzielničaje ŭ humarystyčnaj pieradačy «Dyziel šou».
Dźmitry Tankovič i Pavieł Kryŭčyk. Pracujuć razam z Alaksiejem Palakovym u kampanii «Vaviorka pradakšn».
Viktar Miadviedski i Siarhiej Atroščanka pracujuć u kampanii «IQ pradakšn». Jany taksama pišuć i zdymajuć sieryjały.
Anatol Čajkoŭski. Pracuje na kanale «Intar», stvaraje kantent dla kanała.
Ivan Vabiščevič («Diadia Vania»). Adzin ź niamnohich z «ČP», što zastaŭsia ŭ Biełarusi. Śpiavak, šoumen, radyjoviadučy.
