21 červienia rodnym 40-hadovaha Vadzima Iljušonka paviedamili: mužčyna pamior na stadyjonie adrazu paśla krosa. Pa słovach svajakoŭ, hod nazad jamu źniali hrupu ŁFK, choć u starejšaha kantralora byli prablemy z sercam, paviedamlaje Tut.by.
— Siońnia 9 dzion jak z nami niama Vadzima, tolki viarnulisia z mohiłak, vielmi ciažka, — raspaviadajuć rodnyja starejšaha kantralora žodzinskaj turmy № 8. — U toj dzień jany zdavali kvartalnyja zaliki, adrazu ŭ samoj turmie, potym pajšli na stadyjon na vulicu Savieckuju. Śpiakota była 29 hradusaŭ. Vadzim prabieh paŭtara kiłamietra, stała błaha, jon pamior pobač ź biehavoj darožkaj.
Vadzimu Iljušonku było 40 hadoŭ, u turmie prapracavaŭ bolš za 20.
— Pra toje, što Vadzim pamior, nidzie nie paviedamlajecca, ale ž heta nadzvyčajnaje zdareńnie. Nam tolki kažuć: «Čakajcie», — uzdychajuć svajaki. — Hod tamu Vadzimu źniali hrupu lačebnaj fizičnaj kultury (ŁFK), heta značyć raniej jon nie biehaŭ krosy, a ciapier staŭ. Napiaredadni ŭ Vadzima schapiła serca, jaho vyratavali i ŭsio adno prymusili biehčy. U pamiać urezałasia razmova, jak uhavorvali jaho napiaredadni nie biehčy.
Jak raspaviadaje siamja Iljušonka, hadoŭ šeść u mužčyny byli prablemy z sercam, cisk byŭ pavyšanym. Minuły raz narmatyvy staršy kantralor zdaŭ «pavolna i ciažka».
— Uskryćcio pakazała: u jaho była išemičnaja chvaroba serca. Na jakoj padstavie tady źniali ŁFK? Tam ža pracujuć ludzi va ŭzroście, i čamu jany pavinny biehać u hetuju śpiakotu? — pytajuć svajaki.
Kamientary