29 červienia 2018 hoda byli aryštavanyja kryžy, jakija biełarusy vieźli ŭ Kurapaty, kab abaranić Nacyjanalny miemaryjał ad niačystaj siły.
Aryštavanyja kryžy.
Niabiesny Ojča, adkažy,
Ci čas nam bracca za nažy,
Ci padstaŭlać ščaku druhuju,
Jak padstaŭlaje z hoda ŭ hod
Jašče niaspraŭdžany narod,
Što sam z saboju varahuje?
Daruj nam, Boža. Nie karaj.
Chaj sam siabie źniščaje kraj
Toj rodny kut, što tak nam miły,
Dzie ŭ chramach molimsia čužych,
Dzie miortvym soramna za tych,
Chto źnievažaje ich mahiły!
Darujcie nam, dziady, baćki…
Chaj vam balać, piakuć ćviki,
Jakimi vy raskryžavany,
Chaj Biełaruś, usia ŭ ślazach,
Pakul my tańčym na kaściach,
Hałosić, liža vašy rany!
Niachaj pamiž kryvavych viech
Na ździek sychodzić i na śmiech
Usio, što stała našaj dolaj,
I chaj źniamieje toj narod,
Niachaj toj rod idzie na zvod,
Jaki nie zaručyŭsia z Volaj!
Daruj śmiarotny hrech, Haspodź!
Chaj viek nie skinuć nam abroć,
Chamut, što sami my nadzieli!.
Chaj pracham stanuć duch i płoć,
Ale pakiń nadzieju choć,
Pakiń mnie, Hospadzi, nadzieju…
29.06.2018, Kurapaty
