Skarlet Jochansan admoviłasia ad roli transhiendara praz abureńnie aktyvistaŭ
Skarlet Jochansan admoviłasia ad roli transhiendara ŭ filmie Rub and Tug praz krytyku, vyśvietliŭ časopis Variety.
![](http://nashaniva.com/img/w732d4webp1/photos/z_2018_07/skarlet-hstev.jpg.webp)
«U śviatle niadaŭnich etyčnych pytańniaŭ, jakija ŭźnikli praz maju kandydaturu na rolu Dante Hiła, ja nie budu ŭdzielničać u prajekcie. Naša ŭsprymańnie transhiendarnych ludziej u kultury praciahvaje raźvivacca, i ja šmat čamu navučyłasia ŭ trans-supolnaści z taho času, jak abviaściła pra kastynh i ŭśviadomiła, što była nietaktoŭnaj. Ja staŭlusia da trans-supolnaści ź vialikim zachapleńniem i luboŭju, i ja ŭdziačnaja, što debaty pra inkluziŭnaść u Halivudzie praciahvajucca», — adznačyła aktrysa ŭ liście, jaki raspaŭsiudziła vydańnie One.
«Choć mnie chaciełasia b raskazać pra los Dante i jaho pierachod, ja razumieju, čamu mnohija dumajuć, što jaho pavinien uvasobić transhiendarny akcior», — dadała Jochansan.
Režysioram Rub and Tug budzie Rupiert Sanders, jaki źniaŭ film «Pryvid u daśpiechach». Drama raspaviadaje historyju Dante Hiła — transhiendarnaha mužčyny, jaki trymaje bardel pad prykryćciom masažnaha sałona. Dziejańnie razhortvajecca ŭ 1970—80-ch hadach.
![](http://nashaniva.com/img/w732d4webp1/photos/z_2018_07/gil-6ptby.jpg.webp)
Vybar Jochansan na hałoŭnuju rolu vyklikaŭ niezadavolenaść u sacsietkach. «Vy budziecie hrać nas, a nam nielha hrać lubyja inšyja roli», — aburyłasia transhiendarnaja aktrysa Trejs Lisiet.
Kamientary