19-hadovyja bliźniaty ź Pinska atrymali srebranuju knopku YouTube
Braty Illa i Jaŭhien Šarykały atrymali srebranuju knopku YouTube. Videahostynh uznaharodžvaje joju kanały, jakija majuć 100 tysiač i bolš padpisčykaŭ. Braty zdymajuć humarystyčnyja skietčy, kožny ź jakich nabiraje bolš za 100 tysiač prahladaŭ. Pra pośpiechi junakoŭ piša Radyjo Svaboda.
U mechanikaŭ prahladaŭ bolš za telekanały
Illu i Jaŭhienu pa 19 hadoŭ, jany — braty-bliźniaty. U rejtynhu biełaruskich jutub-błohieraŭ pavodle kolkaści abanentaŭ ichny kanał «Topovyj Pinsk» zajmaje 39 miesca, abhaniajučy telekanały ANT i Biełsat.
Na momant publikacyi «Topovyj Pinsk» maje amal 210 tysiač padpisantaŭ. Kab atrymać srebranuju knopku, daviałosia pačakać: svajho ofisu YouTube u Biełarusi niama, uznaharodu dasyłali z ZŠA praz Nacyjanalny aeraport.
Sioleta braty Šarykały skončyli Pinski ahrarny technalahičny kaledž. Ciapier jany mohuć pracavać mechanikami chaładzilnaha abstalavańnia na miasnym ci małočnym zavodach, ale buduć pracavać na ŭłasnym kanale.
«Zavod — heta nie majo», — kaža Illa.
Zarobak z YouTube akupaje błoh
U kamandzie videabłohu «Topovyj Pinsk» pracujuć 4 čałavieki, časam Illa i Jaŭhien dałučajuć da pracy znajomych. Na starcie błohu braty ŭkłalisia ŭ techniku: nabyli kameru i štatyŭ, ciapier dumajuć pra mikrafon i śviatło.
Illa kaža, što zarobak ź jutubu całkam akuplaje siabie.
Kamanda «Topovoho Pinska»
Žyć u Pinsku, kab rabić cikavy kantent
Illa i Jaŭhien žyvuć u Pinsku i pakul nie źbirajucca pierajaždžać u Miensk. Stvarać kantent možna i tut, ličać jany.
«My časta sustrakajemsia z kalehami: ci my da ich pryjaždžajem (u Miensk ci Maskvu — RS), ci jany da nas. Zdymajem kalabaracyi razam», — kaža Illa.
Kalabaracyja — adzin ź vidaŭ supracy dvuch ci bolš jutuberaŭ, kali błohiery zdymajuć supolnyja videa. Takim čynam adbyvajecca abmien hledačami, a kolkaść padpisantaŭ, jak praviła, pavialičvajecca.
YouTube-kanał «Topovyj Pinsk» pačaŭsia ŭ śniežni 2016 hodu z adnajmiennaj supołki «UKantakcie». Z rostam kanału chłopcy vyrašyli nie admaŭlacca ad pačatkovaj nazvy, bo chacieli, kab bolš ludziej daviedalisia pra Pinsk.
«Tam my publikavali naviny, źviazanyja z horadam, apytańni i hetak dalej. Paślej pačali zdymać roliki dla pinskaj aŭdytoryi, tak nabrali pieršyja 2-3 tysiačy padpisantaŭ. My nie chacieli na hetym spyniacca i pačali zdymać dla šyrejšaj aŭdytoryi», — kaža Illa.
Chto heta hladzić?
Ciapier na kanale vychodziać skietčy dvuch typaŭ: «Karaciej kažučy» i «Kožny čałaviek taki».
Bolš za pałovu hledačoŭ — rasiejcy, bolš za 30% hledačy 18-24 hadoŭ. Sioleta chłapcy majuć 2-3 miljony prahladaŭ na miesiac.
Try parady jutuberam-pačatkoŭcam
Illa paraiŭ čytačam Svabody, jakija dumajuć pra ŭłasny błoh, nastupnaje:
- Vyrašyć dla siabie, čym možna padzialicca ź ludźmi.
- Nie bajacca i nie saromiecca, a taksama nie źviartać uvahu na dumki inšych.
- Rabić kantent rehularna, nie zvažajučy na prahlady.
Ciapier čytajuć
Kaleśnikava: Ja nie razumieju, čamu Jeŭropa nie pačała pieramovy z Łukašenkam raniej za ZŠA15
Kamientary