Na sajcie adździełu adukacyi Barysaŭskaha rajvykankamu źjaviłasia infarmacyja ab mahčymaści naboru ŭ 2018/2019 navučalnym hodzie vučniaŭ u pieršy kłas ź biełaruskaj movaj navučańnia ŭ siaredniaj škole №8.
Pryjom dakumientaŭ pačniecca 12 červienia i zavieršycca 28 žniŭnia 2018 hoda. Pa hetym pytańni možna źviartacca da dyrektara škoły Natalli Dźmitryjevaj pa kantaktnym telefonie 8 (0177) 93 15 60.
Inicyjataram adkryćcia biełaruskaha pieršaha kłasa stali baćki budučaj pieršakłaśnicy Hanny Miaškovaj.
Jak raspavioŭ jaje baćka, Siarhiej Miaškoŭ, u ich chacie havorać pa-biełarusku. Dzieci ŭ sadok nie chadzili, pakolki biełaruskich hrupaŭ u barysaŭskich daškolnych ustanovach nie było, a ŭ Siarhieja była mahčymaść utrymlivać siamju. Takim čynam, i syn, i dačka vyraśli ŭ biełaruskamoŭnym asiarodździ.
Adsiul žadańnie vučyć dziaciej na rodnaj movie było naturalnym. Na žal, sa starejšym synam Jazepam, jaki pajšoŭ u pieršy kłas u minułym hodzie, spraŭdzić heta žadańnie nie atrymałasia.
— U Barysavie, jak viadoma, jość biełaruskaja himnazija. Ale adpraŭlać šaścihadovaha syna adnaho z vulicy Horkaha ŭ Stary horad nierealna, a dla taho, kab supravadžać chłopčyka, maci treba było b pakinuć pracu piedahoha. Tamu skončyŭ Jazep pieršy kłas pa miescy žycharstva ŭ 11 SŠ, — skazaŭ Siarhiej Miaškoŭ.
U hetym hodzie Siarhiej pačaŭ baraćbu za navučańnie dački ŭ škole na biełaruskaj movie jašče ź lutaha. Sustrakaŭsia nieadnarazova z zahadčykam adździełu adukacyi Barysaŭskaha rajvykankamu Uładzimiram Vołkavym. I nie adrazu, ale ŭ rešcie rešt, było pryniata rašeńnie adkryć nabor u pieršy kłas ź biełaruskaj movaj navučańnia ŭ siaredniaj škole №8.
Pakul pretendentka na navučańnie adna. Ale Siarhiej i jahonaja žonka Taćciana spadziajucca, što ŭ novaj častcy horadu znojducca baćki, jakija voźmuć ź ich prykład. Miaškovy marać jašče i ab tym, kab da Hanny dałučyŭsia i Jazep. Bo ŭ sielskich małakamplektnych pačatkovych škołach isnuje takaja praktyka, kali adzin nastaŭnik viadzie adnačasova niekalki kłasaŭ. Čamu nielha taksama samaje zrabić u horadzie? Stanoŭčaha adkazu na hetaje pytańnie pakul niama.
Źviazacca z baćkami Hanny Miaškovaj možna pa telefonach: velcom 8-029-117-66-90 Siarhiej; MTS 8-033-355-05-82 (viber) Taćciana.
