Kamunisty zastajucca viernymi sabie. I sioleta da pomniku Lenina na płošču Niezaležnaści pryjšło niekalki kalon prychilnikaŭ vialikaha kastryčnika.
Siońnia ŭ Biełarusi adznačajecca 91‑aja hadavina Kastryčnickaj revalucyi 1917 hodu. Tolki ŭ našaj krainie na ŭsioj postsavieckim prastory hety dzień praciahvaje być dziaržaŭnym śviatam. Zrešty, jedučy na płošču Niezaležnaści praz vakno «sotki» bačyŭ ministra ŭnutranych spravaŭ Uładzimiera Navumava, jaki išoŭ na pracu. Peŭna, niama ŭ jaho ni vychadnych, ni śviataŭ.
Kamunisty ž zastajucca viernymi sabie. I sioleta da pomniku Lenina na płošču Niezaležnaści pryjšło niekalki kalon prychilnikaŭ vialikaha kastryčnika. Hetym razam i nadvorje spryjała, nia toje, što letaś, kali išoŭ vialiki śnieh.
Pieršymi pa tradycyj pryjšli siabry praŭładnaj KPB. Razbaŭlenyja «kamsamolcami» z BRSM. Ichny pikiet byŭ samy masavy. Napeŭna, było niekalki socień čałaviek. Z savieckimi i erbešnymi ściahami. Uskłali kvietki. Pastajali niekalki chvilin. Pahanili miž saboj Kalakina, jaki «zdradziŭ ideałam kamunizmu i siadzić na kapitalistyčnych padačkach».
Hetym razam nie było hanarovaj varty i arkiestru. Nie było i doŭhich pramovaŭ. Pavinšavaŭšy adzin adnaho sa śviatam, udzielniki akcyi pajechali na «liniju Stalina».
Potym padyšła nievialikaja hrupka, čałaviek piatnaccać, siabroŭ arhanizacyi «Za demakratyju, sacyjalny prahres i spraviadlivaść». Papieradzie ichnaj kalony išoŭ niejki chłopiec sa značkom «Razmaŭlaj sa mnoj pa‑biełarusku». Jany adznačyli, što «čarhovuju hadavinu Kastryčnickaj revalucyi kraina adznačaje va ŭmovach iłžedemakratyi». Ale jany vierać, što Biełaruś vierniecca da sapraŭdnaha sacyjalizmu.
Potym jany pajšli ŭskładać kvietki da šyldy Śviardłovu.
Adna žančyna ŭskliknuła, što pa jaje infarmacyi ŭ chutkim časie vulicu Śviardłova źbirajucca pierajmienavać. Hetaje «vierałomnaja źmiena nazvaŭ vulic» vyklikała burnuju reakcyju ŭ kamunistaŭ i jany źbirajucca «dabivacca histaryčnaj praŭdy».
«I hetyja ludzi jašče buduć paprakać apazycyju ŭ razdroblenaści», — kazaŭ niechta z kalehaŭ, kali da Lenina padychodziła čarhovaja partyja kamunistaŭ.
Samymi kalarytnymi byli, jak zaŭsiody, balšaviki z VKPB, jakich było niekalki dziesiatkaŭ. Tradycyjnyja partrety Stalina i Lenina, čyrvonyja ściahi, oaściažka «Dałoŭ kapitalizm».
Za što padabajucca kamunisty, dyk heta za ichny aptymizm.
Štohod jany znachodziać suśvietnyja tendencyi, jakija śviedčać pra toje, što śmierć kapitalizmu i pieramoha sacyjalizmu niepaźbiežnyja. Letaś havaryli pra prychod sacyjalistaŭ da ŭłady ŭ krainach Łacinskaj Ameryki, sioleta — pra suśvietny finansavy kryzis.«Kali ŭ Savieckim sajuzie ty kłaŭ u bank rubiel, ci dziesiać rubloŭ, to i praź dziesiać hadoŭ jany nie abiasceńvalisia», — kazaŭ pravadyr balšavikoŭ. Siońniašniuju sytuacyju ŭ krainie jon nazvaŭ «pieramohaj kontrrevalucyi», ale kryzis usio rasstavić na svaje miescy.
Balšaviki ž paśla Lenina pajšli da biustu Dziaržynskaha.
Apošnim punktam prahramy było ŭskładańnie kvietak ad subjektu ADS Partyi kamunistyčnaj biełaruskaj. Užo druhi hod zapar jany byli biez usialikich ściahoŭ i raściažak. Jany prosta ŭskłali vianok.
Nikoha ź lideraŭ nie było. Kažuć, što Siarhiej Kalakin u kamandziroŭcy, dzie - nie ŭdakładnili, a jahony namieśnik Valery Ŭchnaloŭ u hety dzień uskładaŭ taksama kvietki da pomniku Lenina. Što praŭda, u Kapenhahienie.
Byli čutki, što na akcyi pavinny byli źjavicca siabry «Maładoha frontu» z transparantam «Patrabujem sudu nad kamunizmam», ale ŭsio prajšło cicha.
PKBoŭcy byli adzinymi, chto paśla Lenina razyšoŭsia pa damach, a nie nakiravalisia da inšych lideraŭ revalucyi.
Taki voś tradycyjny farmat 7 listapada.
Ciapier čytajuć
Syn Siarhieja Bulby źbiraje hrošy ŭ Polščy, prydumaŭšy sabie bijahrafiju vieterana i palityčnaha ŭciekača29
Kamientary