Kolišniaja pieršaja namieśnica Administracyi prezidenta, «žaleznaja łedzi» biełaruskaj palityki Natalla Piatkievič, jakaja z 2006 hodu znachodzicca pad sankcyjami ZŠA, zaśviaciłasia ŭ Ńju-Jorku.
Fota ŭ svaim tvitary vykłaŭ adzin z amierykanskich čynoŭnikaŭ, pa ironii — daradca pa pytańniach pravoŭ čałavieka Ravi Batra, jaki, miarkujučy pa jaho dopisach, trymajecca žorstkaj linii ŭ dačynieńni da Rasii.
Na fota možna ŭbačyć samu Natallu Piatkievič, jaje muža — kiraŭnika biełaruskaha pradstaŭnictva ŭ AAN Valancina Rybakova, syna Piatkievič — Filipa, a taksama amierykanskich palicejskich.
Fota zroblena 27 lipienia.
Natalla Piatkievič pa-raniejšamu zastajecca pad amierykanskimi sankcyjami. Adnak latać da muža ŭsio adno moža praz pravavuju kaliziju — farmalna Rybakoŭ moža zaprasić jaje da siabie pa linii AAN, a nie ŭ ZŠA jak dziaržavu.
Adzinaje, što Piatkievič nie zmoža karystacca za akijanam vyhodami, jakija patrabujuć identyfikacyi asoby, kštałtu atrymańnia paśviedčańnia kiroŭcy ci adkryćcia rachunku.
Niekali Piatkievič aburałasia staŭleńniem da jaje ŭ amierykanskich aeraportach u intervju «Ruskaj Amierycy»:
«Paśla prybyćcia ŭ aeraport Kenedzi mianie zahnali ŭ adstojnik. Ja maju dypłamatyčny pašpart, źjaŭlajusia vysokaj słužbovaj asobaj suvierennaj dziaržavy, a mianie kala hadziny trymali ŭ adstojniku razam z pasažyrami z Afryki i inšych krain, u jakich byli surjoznyja prablemy z dakumientami», — kazała jana.
Ale vyhladaje, što na hety raz Piatkievič pierabrałasia da muža nadoŭha — toj ža Batra ŭ svaim tvitary pościŭ fota ź viečaryny ŭ honar «dałučeńnia Natalli da muža».