Jašče 2 listapada, kali ŭ Śvisłačy i na terytoryi rajonu adznačaŭsia Dzień pamiaci paŭstancaŭ 1863 hodu, Anatol Valuk byŭ zatrymany pozna ŭviečary, kali viartaŭsia na rovary dachaty. Aktyvista zatrymali kala samaha domu, i razam z rovaram dastavili ŭ miascovy aporny punkt, dzie jamu prapanoŭvali padpisać składzieny pratakoł ab nibyta administracyjnym pravaparušeńni i pałochali administracynym aryštam. Anatol Valuk admoviŭsia padpisvać pratakoł i ŭrešcie hramadskaha aktyvista zavieźli dachaty.
Praz paru dzion dachaty da Valuka pryjechaŭ učastkovy milicyjant i prapanavaŭ pajechać razam u RAUS. Anatol Valuk zapatrabavaŭ trymacca zakonnaści i vypisać jamu pozvu naležnym čynam. Kali pozva była aformlena, Valuk źjaviŭsia ŭ RAUS, dzie namieśnik staršyni adździełu milicyi Sałahubik vypisaŭ jamu štraf pamieram 35 tysiač rubloŭ. Hramadskamu aktyvistu inkryminavałasia znachodžańnie 2 listapada ŭ centry horadu nibyta ŭ niećviarozym i nieachajnym stanie. Sam Anatol Valuk kateharyčna adprečvaje hetaje prydumanaje i absurdnaje abvinavačańnie.
Jak paviedamlajuć pravaabaroncy z Harodni, praciah hetaj historyi nadaryŭsia ŭ subotu, 8 listapada, kali dadomu da Valuka zajavilisia milicyjanty z aŭtamatami — nibyta ich terminova vyklikali pa hetym adrasie. Paśla pryznańnia «pamyłkovaści» vykliku milicyjanty źjechali. Anatol Valuk ličyć usie hetyja dziejańni spłanavanaj doŭhaterminovaj akcyjaj jaho pieraśledu miascovaj uładaj.
Nahadajem, što ŭ minułyja hady Anatol Valuk nieadnarazova aryštoŭvaŭsia i pieraśledavaŭsia śvisłackaj milicyjaj napiaredadni i paśla važnych hramadska‑palityčnych padziej.