Šeść hadzin pracoŭnaha navučańnia ŭ tydzień: dziesiacikłaśnikaŭ miarkujecca adpraŭlać u PTV
U 10 kłasie ŭvodziać až 6 hadzin pracoŭnaha navučańnia. Baćki pieražyvajuć, što heta pieratvorycca ŭ prafanacyju: u škołach niama nijakaj bazy dla navučańnia, i dzieci buduć pryvučacca bić łyndy. Rastłumačyć novaŭviadzieńnie «Naša Niva» paprasiła ŭ Ministerstva adukacyi. Tam nam litaralna pa punktach patłumačyli, čaho čakać dzieciam i baćkam ad źmienaŭ u navučalnym płanie.
«Chočam zrabić ich mabilnymi na rynku pracy»
«Adnym z najvažniejšych pakazčykaŭ efiektyŭnaści sistemy adukacyi źjaŭlajecca paśpiachovaść prafaryjentacyi. Bo jakaść adukacyi — heta nie adznaka, atrymanaja na ŭroku, a paśpiachovaje žyćcieŭładkavańnie čałavieka, jaho mabilnaść na rynku pracy», — patłumačyli ŭ Ministerstvie adukacyi.
Asnoŭnaja zadača škoły, ličać u ministerstvie, dapamahčy vučniu vybrać prafiesiju.
Ad 2018/2019 navučalnaha hoda va ŭstanovach ahulnaj siaredniaj i va ŭstanovach śpiecyjalnaj adukacyi dla vučniaŭ X (XI) kłasaŭ, jakija vyvučajuć usie vučebnyja pradmiety na bazavym uzroŭni, uviedzieny vučebny pradmiet «Pracoŭnaje navučańnie». Zasvojvać novyja prafiesii vučni zmohuć jak na bazie svajoj škoły, tak i na bazie ŭstanovy siaredniaj śpiecyjalnaj ci prafiesijna-techničnaj adukacyi.
Pieralik prafiesij, jakimi moža avałodać vučań, zaležyć ad jaho miesca žycharstva
Praściej kažučy, prafiesijnaj padrychtoŭkaj vučniaŭ buduć zajmacca na bazach kaledžaŭ abo inšych siarednich śpiecyjalnych ustanoŭ taho horada abo miastečka, dzie znachodzicca škoła.
«Ustanovy adukacyi mohuć samastojna raspracoŭvać prahramy prafiesijanalnaj padrychtoŭki i zaćviardžać ich va ŭstanoŭlenym paradku. Pry raspracoŭcy źmiestu vučebnych prahram rekamiendujecca vykarystoŭvać typovyja vučebnyja prahramy pa śpiecyjalnaściach prafiesijanalna-techničnaj adukacyi».
Da prykładu, vučni zmohuć avałodać takimi prafiesijami, jak pradaviec, apieratar elektronnaha naboru i viorstki, kuchar, sakratar, ciaślar, cyrulnik, aficyjant, ślesar pa ramoncie mašyn i hetak dalej.
Pres-słužba Ministerstva adukacyi padkreślivaje:
«Pry adsutnaści mahčymaści arhanizacyi pracoŭnaha navučańnia pry realizacyi adukacyjnaj prahramy prafiesijanalnaj padrychtoŭki rabočych (słužačych) u škołach mohuć być vykarystany bazy ustanoŭ prafiesijna-techničnaj, siarednie-śpiecyjalnaj, vyšejšaj, dadatkovaj adukacyi darosłych, dadatkovaj adukacyi dziaciej i moładzi».
Maksimalnaja praktyčnaść i padrychtavanyja abituryjenty — asnoŭnaja meta takich urokaŭ
Nie ŭsim prafiesijam, pra jakija marać školniki, na ŭrokach «Pracoŭnaha navučańnia» buduć vučyć. Pa-pieršaje, va ŭstanovie adukacyi buduć uličvać uzrost vučniaŭ.
«Asnoŭnaj metaj pracoŭnaha navučańnia źjaŭlajecca pradastaŭleńnie vučniam mahčymaści atrymać pieršasnyja navyki pa peŭnaj prafiesii. Što tyčycca źmiestu vučebnaha pradmieta «Pracoŭnaje navučańnie», to jon pavinien być maksimalna praktyka-aryjentavanym».
Hiendarna dzialić dziaciej nie buduć
Prahrama nie praduhledžvaje dzialeńnia vučniaŭ pa hiendarnym pryncypie. Farmiravańnie vučebnych hrup ažyćciaŭlajecca pa prafiesijach, niezaležna ad połu dziciaci».
Inšyja pradmiety ad uviadzieńnia šaści hadzin na pracu nie pacierpiać
«Zhodna z pastanovaj Ministerstva adukacyi, pry realizacyi adukacyjnaj prahramy prafiesijanalnaj padrychtoŭki rabočych (słužačych) vydzialajecca 6 vučebnych hadzin na tydzień. Kolkaść hadzin, jakija adviedzieny na vyvučeńnie inšych vučebnych pradmietaŭ u hetym kłasie, nie źmianiłasia».
Akramia taho, u mietadyčnych rekamiendacyjach ukazana, što zaniatki pa pradmiecie «Pracoŭnaje navučańnie» možna pravodzić jak u budnyja dni, tak i ŭ subotu. Pry hetym vučni pavinny być zabiaśpiečanyja haračym charčavańniem.
Hrošy, vydzielenyja biudžetam, pavinny vydatkoŭvacca na zarobak, uznosy (adličeńni) na sacyjalnaje strachavańnie, apłatu kamunalnych pasłuh, nabyćcio pradmietaŭ zabieśpiačeńnia i raschodnych materyjałaŭ i inš.
Kab ažyćciaŭlać navučańnie ŭ škołach, u štacie dadzienych ustanoŭ pavinna być štatnaja kolkaść nastaŭnikaŭ i majstroŭ vytvorčaha navučańnia.
«Vučebnyja hadziny pa pradmiecie «Pracoŭnaje navučańnie» ŭklučajucca na pačatak navučalnaha hoda ŭ śpis piedahahičnych rabotnikaŭ, jakim vyličajucca staŭki i nadbaŭki za kvalifikacyjnyja katehoryi z ulikam piedahahičnaj nahruzki dla vyznačeńnia fondu apłaty pracy».
5 vieraśnia ŭ tych škołach, da jakich my datelefanavalisia, zaniatki pa pradmiecie «Pracoŭnaje navučańnie» pakul nie pačalisia. «Čakajem, jakija prafiesii prapanujuć vyvučać našym školnikam u kaledžach», — adkazali ŭ adnoj sa škoł.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary