Stanisłaŭ Šuškievič sychodzić z pasady lidara BSDH, novym lidaram moža stać były člen KPB
U hetyja vychodnyja projdzie VII źjezd partyi «Biełaruskaja sacyjał-demakratyčnaja Hramada», niaźmiennym lidaram jakoj z 1998 hoda źjaŭlajecca Stanisłaŭ Šuškievič. Na źjeździe budzie abrany novy lidar partyi, Šuškievič bałatavacca nie źbirajecca.
U eks-śpikiera Viarchoŭnaha savieta Stanisłava Stanisłavaviča zaraz prablemy sa zdaroŭjem, tamu na źjezd partyi jon sam, chutčej za ŭsio, nie trapić.
— Ščyra kažučy, mnie ŭžo daŭno nie z ruki zajmacca partyjnaj pracaj — mnie 83 hady ŭsio-taki, dastała, — kaža Stanisłaŭ Šuškievič.
— Kažuć, partyju ŭznačalić Siarhiej Čeračeń, što niadaŭna zaniaŭ pasadu vašaha namieśnika. Heta praŭda?
— Ja nie viedaju, kaho abiaruć, tamu nie budziem abmiarkoŭvać. Sprava ŭ tym, što ŭ nas vielmi surjoznaje tajnaje hałasavańnie, aktyŭny biuleteń, narod u nas vielmi surjozny, daśviedčany i vielmi mnohaje vyznačajuć staryja kadry — jany členy Centralnaj rady i ŭ ich pieravaha delehacyi źjezda, tamu davajcie nie budziem apiaredžvać padziei. Kolki budzie kandydataŭ, pakul skazać nie mahu, ale sam ja viadoma bałatavacca nie budu, treba razvažać razumna. Ja ŭžo vielmi daŭno nie chacieŭ bałatavacca, ale kali ŭźnikała pytańnie, usie kazali: nam z taboj lahčej - my prabiŭnyja. Ale zaraz užo chopić, budziem bolš prabiŭnyja bieź mianie, - kaža palityk.
Pra toje, chto źmienić Šuškieviča na pasadzie lidara partyi, palityk nie kaža. Jak i pra toje, kolki čałaviek budzie pretendavać na hetuju pasadu, pakul nieviadoma.
Siarhiej Čeračeń — były člen Kamunistyčnaj partyi Biełarusi.
U 2016 hodzie sprabavaŭ vyłučycca ŭ deputaty Mirašničenkaŭskaj akruhi Minska, ale Savieckaja rajonnaja vybarčaja kamisija admoviła jamu ŭ rehistracyi, spasłaŭšysia na toje, što 32,1% sabranych Čeračniem podpisaŭ za jaho vyłučeńnie byli niesapraŭdnymi. Byŭ, darečy, adnym z samych bahatych u śpisie achvotnych stać deputatam - na toj momant, zhodna z dekłaracyjaj, jaho dachod składaŭ 4,3 tysiačy dalaraŭ. 21 lipienia 2018 hoda padčas schodu Centralnaj Rady Biełaruskaj sacyjał-demakratyčnaj Hramady byŭ abrany novym namieśnikam staršyni centralnaj Rady partyi.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary