Usie ŭ pastcy

Samaje prykraje, što pytańnie pra bieły ściah zaležyć ad kamendanta biełaruskaje fartecyi. Piša Alaksandar Kłaskoŭski.

Našy dziaržaŭnyja medyi vinavaciać za nahniatańnie hazavych žarściaŭ «niačesnych» maskoŭskich pisakaŭ. Adkul, maŭlaŭ, vysmaktali až 200 dalaraŭ koštu (apošniaja versija rasiejskaha ŭltymatumu)?

Ale, kolki ni sprabuj pieravieści strełki, upartym faktam zastajecca toje, što pra eŭrapiejskija košty dla Biełarusi pieršym skazaŭ dziadźka Miler.

Razam z tym maskoŭskija dziadźki vydatna razumiejuć, što $200 biełaruskaja ekanomika nie paciahnie. Čaho ž jany chočuć?

Siarod palitykaŭ dy palitolahaŭ hulaje słoŭca «anšlus». Pra jaho vysokuju imaviernaść kažuć aŭtarytetnyja fihury – ad rasiejca Pijantkoŭskaha da niemca Rara.

Mierkavany mechanizm: biełaruskaha prezydenta schilać da kanstytucyjnaha aktu na ŭmovach Kramla, astatniaje ž budzie spravaj techniki.

Mnohim padajecca, što Miensk trapiŭ u pastku sajuznaj damovy. Źjaviłasia navat versija, što ŭ dasłanym niadaŭna kanfidencyjnym liście rasiejskamu kalehu premjer Sidorski pryhraziŭ denansacyjaj hetaj damovy, kali nadta zadziaruć hazavyja košty.

Tut možna zhadzicca ź dziaržaŭnaj presaju: nichto Sidorskamu hulać u takija hulni nie dazvolić. Bo ŭ krainie, jak viadoma, tolki adzin palityk. I voś jon, kali što, sapraŭdy moža adstralacca pa Kramli ŭsim bojezapasam kontrarhumentaŭ.

Darečy, apošniaje apytańnie pad ehidaj hrupy Manajeva zaśviedčyła, što ŭ hetym sensie ŭ aficyjnaha Miensku nadziejny tył. 61,3% respandentaŭ ličać, što nie pa-ludzku dzierci z najlepšaha chaŭruśnika stolki ž, jak z astatnich pakupnikoŭ «błakitnaha paliva». 58% za toje, kab vystavić Maskvie kruty sustrečny rachunak. Narešcie, taje dumki, što «Biełtranshaz» nielha pradavać ni ŭ jakim razie, prytrymlivajucca až 82% biełarusaŭ! Karaciej, u vypadku novaj hazavaj vajny narod padtrymaje kiraŭnictva.

Kali ŭžo na toje, dyk u pastcy sajuznaj damovy najchutčej što apynajecca Kreml. Pad zvon čarak dziadula Jelcyn ščodra padmachnuŭ niekali papieru, dzie sapraŭdy zamacavanyja pryncypy farmalnaj roŭnaści. Voś hetaj papierčynaj, jak davodzić, u pryvatnaści, naš ekspert Valer Karbalevič, Łukašenka i budzie bić Maskvu da apošniaha. Paradaksalna, ale biurakratyčnyja navaroty «bratniaj intehracyi» mohuć abjektyŭna paspryjać abaronie suverenitetu.

Kiroŭnaja kamanda zusim nie zacikaŭlena zdavać niakiepska abstalavanuju suverennuju fartecyju. Jość imaviernaść taho, što ŭ vyniku čarhovaha kryzisu Miensk i Maskva prosta zrobiać krok da bolej naturalnych, prahmatyčnych, sapraŭdy miždziaržaŭnych stasunkaŭ. Heta krok da taho, za što i zmahajucca stolki hadoŭ apanenty režymu.

U hetaj schiemie jość chiba adzin prykry momant. Usio zaležyć ad kamendanta fartecyi. A raptam niejkija zabojčyja arhumenty Kramla zmusiać vykinuć bieły ściah?

U krainy niama demakratyčnaha mechanizmu abarony niezaležnaści. Jaje adeptam zastajecca adno što namiakać na partyzanskija tradycyi ci prasić harantyjaŭ ad anšlusu na Zachadzie. Na takim tle trochi štučnymi vyhladajuć sproby ranhavać hetyja dva paniatki – niezaležnaść i demakratyja.

• 0
• 0
• 0
• 0
• 0
• 0
• 0
• 0