Time nazvaŭ najbolš imaviernych atrymalnikaŭ Nobieleŭskaj premii miru

Łaŭreatam Nobieleŭskaj premii miru štohod stanovicca čałaviek ci arhanizacyja, jakija, na dumku Nobieleŭskaha kamiteta, zrabili bolš za inšych dla dasiahnieńnia miru na płaniecie. Kamitet nie raskryvaje infarmacyju ab pretendentach na premiju. Viadoma tolki ich kolkaść — sioleta na atrymańnie ŭznaharody vyłučany 331 pretendent — 216 čałaviek i 115 arhanizacyj.

Adhadać najbolš imaviernaha kandydata z ulikam ich ahulnaj kolkaści i niepradkazalnaści Nobieleŭskaha kamiteta vielmi składana, padkreślivaje Time. Tym nie mienš, skłaści peŭny śpis mahčyma, u tym liku i z ulikam źviestak bukmiekierskich kantor, jakija prymajuć staŭki na pieramohu taho ci inšaha pretendenta

Hałoŭnymi pretendentami ŭ śpisie Time značacca ŭdzielniki dyjałohu vakoł losu Karei — lidar KNDR Kim Čen Yn, prezident Paŭdniovaj Karei Mun Čže In i prezident ZŠA Donald Tramp.

Lidary Poŭnačy i Poŭdnia prykłali namahańni da taho, kab spynić jadziernuju honku na paŭvostravie i spynić jadziernyja vyprabavańni, jakija pravodziacca KNDR, adznačaje Time. Heta robić ich vidavočnymi favarytami ŭ śpisie kandydataŭ na Nobieleŭskuju premiju. Tym nie mienš, kamitetu budzie składana nie brać pad uvahu acenki AAN nakont situacyi ŭ KNDR. Pavodle źviestak pravaabaroncaŭ, u krainie praciahvajucca masavyja parušeńni pravoŭ čałavieka.

Śledam za kiraŭnikami Paŭnočnaj i Paŭdniovaj Karei staić jašče adzin udzielnik mižkarejskaha dyjałohu — prezident ZŠA. Uviesnu Donald Tramp damohsia pieršaj u historyi sustrečy lidaraŭ Złučanych Štataŭ i KNDR, jakaja prajšła ŭ Sinhapury. Najbujniejšaja brytanskaja bukmiekierskaja kantora Ladbrokes aceńvaje šancy Trampa na pieramohu jak 5 da 2, adznačaje Time.

Jak mienš imaviernymi aceńvajucca šancy na atrymańnie premii Karlesam Pučdemonam. Inicyjatar refierendumu ab adździaleńni Katałonii ad Ispanii byŭ vymušany pakinuć krainu ŭ suviazi ź pieraśledam z boku ŭładaŭ. Paśla hetaha ŭvaha da jaho piersony źniziłasia. Tym nie mienš, jaho šancy na atrymańnie premii Ladbrokes usio jašče aceńvaje ŭ 12 da 1. Siarod pretendentaŭ taksama nazvanyja Papa Francišak (16 da 1) i błohier z Saudaŭskaj Aravii Raif Badavi, jaki znachodzicca ŭ źniavoleńni pa abvinavačvańniach u abrazie isłamu. Siarod pretendentaŭ ź liku arhanizacyj Time najbolš imaviernym atrymalnikam premii nazyvaje Upraŭleńnie viarchoŭnaha kamisara AAN pa spravach biežancaŭ. Hetaja struktura raniej užo dvojčy atrymlivała Nobieleŭskuju premiju miru: ŭ 1954 i 1981 hadach.

U 2017 hodzie łaŭreatam Nobieleŭskaj premii miru stała Mižnarodnaja kampanija za likvidacyju jadziernaj zbroi (ICAN).

U hetym hodzie abviaščeńnie łaŭreata premii adbudziecca 5 kastryčnika ŭ Osła.

• 0
• 0
• 0
• 0
• 0
• 0
• 0
• 0