Žychara Homiela, jaki pracavaŭ taksistam, spynili nočču na vulicy Chatajeviča. Svaju viersiju padziej kiroŭca raspavioŭ partału abw.by.
Jon śćviardžaje, što daišniki nie patłumačyli, za što jaho spynili. Takist kaža, što paprasiŭ daišnikaŭ: maŭlaŭ, spačatku skažycie, čamu spynili, paśla ja pakažu dakumienty. A jany ŭ adkaz prosta pačali afarmlać pratakoł za toje, što dakumientaŭ u kiroŭcy nibyta nie było. Pryčym, nastojvaje kiroŭca, spynili jaho pad znakam «spyniacca zabaroniena».
Paśla mužčyna pačaŭ zdymać dziejańni daišnikaŭ. Adnamu ź inśpiektaraŭ heta vielmi nie spadabałasia. Jon niekalki raz skazaŭ, što jaho zdymać nielha, paśla adabraŭ telefon, vykryknuŭšy svajmu naparniku: «23.4!» Majecca na ŭvazie artykuł 23.4 KoAP — niepadparadkavańnie słužbovaj asobie.
Paśla taksistu nadzieli kajdanki, zabrali ŭ jaho telefon i pavieźli ŭ adździaleńnie. Ranicaj mužčynu adpuścili, telefon addali. Videa na im zachavałasia.
Žurnalisty abw.by źviazalisia z homielskaj aŭtainśpiekcyjaj, ale DAI nijak prakamientavała dziejańni inśpiektara.
Taksist nakiravaŭ skarhu na dziejańni daišnikaŭ.
Ale varta adznačyć, što pytańnie sa zdymkaj milicyjanta davoli sprečnaje. Jość niekalki jurydyčnych traktovak nakont taho, ci možna zdymać milicyjanta padčas afarmleńnia.
Kamientary