2 listapada ŭ Minsku Źmicier Vajciuškievič ładzić kancertnuju prezientacyju novaha alboma «Lublu» na vieršy Uładzimira Majakoŭskaha. Siońnia adbyłasia premjera pieśni «Pasłuchajcie» ź jaho, napisanaj na biełaruski pierakład aŭtarstva Ryhora Baradulina.
— Kali vyjšaŭ moj pieršy albom na vieršy Majakoŭskaha ŭ 2005 hodzie, Baradulin mianie spytaŭ, čamu ja nie skarystaŭ nidzie biełaruskija pierakłady. A ja prosta niejak nie padumaŭ, što jany jość! I voś hetym razam uzhadaŭ, zrabiŭ — vielmi taki pranikniony i śvietły tekst, jaki chaciełasia dapoŭnić adpaviednaj muzykaj, — raspaviadaje Vajciuškievič.
Pierakład «Pasłuchajcie» byŭ zrobleny Ryhoram Baradulinym jašče na pačatku 80-ch i vydadzieny ŭ adnajmiennym zborniku. Akramia hetaj kampazicyi na albomie «Lublu» budzie jašče adna pieśnia na biełaruskaj — «Razmova ź fininśpiektaram ab paezii» ŭ pierakładzie Vitala Ryžkova.
Kancertnaja prezientacyja dyska adbudziecca ŭ zale «OK16» (vuł. Kastryčnickaja, 16). Na scenu Vajciuškievič hetym razam vyjdzie z Apple Tea, Alaksandram Šuvałavym i inšymi ŭdzielnikami prajekta. U pieršaj častcy prahučyć novy albom, u druhoj — najlepšyja pieśni ź inšych dyskaŭ Vajciuškieviča.
Kvitki: ad 24 da 33 rubloŭ na sajcie i ŭ kasach Kvitki.by.
Pačatak u 19:00.
Daviedka: (033) 661 14 32.
Kamientary