Śviatar Ihnacij Łukovič staŭ jepiskapam Baraŭlanskim, vikaryjem Minskaj jeparchii.
25 kastryčnikaŭ u chramie Chrysta Zbaŭcy ŭ Maskvie jaho vyśviaciŭ patryjarch Kirył.
Mitrapalit Pavieł (sprava) i jepiskap Baraŭlanski Ihnacij. Fota church.by.
Jašče 15 kastryčnika členy Sinoda RPC zasłuchali dakład mitrapalita Paŭła ab nieabchodnaści mieć vikarnaha archijereja. Vikaryj — heta taki jepiskap, jaki nie maje svajoj jeparchii i dapamahaje inšamu jepiskapu.
To bok Ihnacij Łukovič budzie pamočnikam ci navat namieśnikam Paŭła. Usimi spravami, jakija nie budzie paśpiavać vyrašać Pavieł, ciapier budzie zajmacca novy jepiskap. Raniej takija funkcyi jašče pa staroj pamiaci vykonvaŭ jepiskap Barysaŭski Vienijamin, ale ŭ jaho ciapier jość svaja paŭnavartasnaja jeparchija.
Chto taki jepiskap Ihnacij? Jahonaje imia Ihar Łukovič. Śviataru 48 hadoŭ, jon rodam z Maładziečna. Pa śvieckaj adukacyi — radyjomiechanik. Vučyŭsia ŭ Minskaj duchoŭnaj sieminaryi i Maskoŭskaj duchoŭnaj akademii.
Byŭ pastryžany ŭ manachi archimandrytam Huryjem (na toj momant jašče nie jepiskapam Navahrudskim) u 1993 hodzie. Atrymaŭ manaskaje imia Ihnacij.
Vykładaŭ u Minskaj duchoŭnaj sieminaryi Historyju ruskaj carkvy i liturhiku. U 2002 hodzie staŭ nastajacielem carkvy ŭ honar Cichvinskaj ikony Maci Božaj u Breście. Uznačalvaŭ pałomnicki adździeł Bresckaj jeparchii. Varta adznačyć, što ładzić pilihrymki i vyjezdy ŭ śviatyja miaściny dla viernikaŭ — vyhadny biznes.
U svaim zvarocie jepiskap Ihnacij skazaŭ nastupnaje: «Sardečna dziakuju Vysokapraaśviaščeńniejšaha mitrapalita Fiłareta, hanarovaha Patryjaršaha ekzarcha, i ŭsich archipastyraŭ Biełaruskaha ekzarchata za jaho dobraje abychodžańnie da mianie.
Asabliva chočacca padziakavać Vysokapraaśviaščeńniejšamu mitrapalitu Paŭłu, jaki rekamiendavaŭ mianie ŭ jakaści kandydata na jepiskapski san, za jaho baćkoŭskaje i ciopłaje staŭleńnie, jakoje tak palubiłasia nie tolki mnie, ale i ŭsiamu biełaruskamu narodu», — adznačyŭ Ihnacij.
«Ale bolš za ŭsio chaču padziakavać vam, vaša śviataść! U ciapierašni čas vyprabavańniaŭ nie tolki dla Ruskaj pravasłaŭnaj carkvy, ale i dla ŭsiaho pravasłaŭja, vy svaim spakojem i mudraściu pakazvajecie prykład praŭdzivaha archipastyra!» — tak jon skazaŭ patryjarchu Kiryłu.
Na siońnia ŭ Biełarusi naličvajecca piatnaccać jepiskapaŭ, aproč mitrapalita Paŭła.
Ihnacij stanie druhim vikarnym jepiskapam. Pieršym źjaŭlajecca jepiskap Dziatłaŭski Piatro, jaki dapamahaje jepiskapu Navahrudskamu Huryju.
