Vyniesieny prysud Alaksandru Barazienku. Sudździa pryznała jaho vinavatym ŭ parušeńni art. 341-1 KK. Chłopca vyzvalili prosta ŭ zali suda.
Fota Uładzia Hrydzina |
16:40 Sudździa pryznała Alaksandra Barazienku vinavatym ŭ parušeńni art. 341-1 KK
i vyznačyła pakarańnie adzin hod abmiežavanńnia voli biez nakiravańnia ŭ śpiecustanovy.
Alaksandra prosta vyzvalili ŭ zale suda. Ina Kulej uručyła jamu kvietki. Usie abdymajuć chłopca i vinšujuć z vyzvaleńniem. Svajaki i siabry płačuć.
«Adzinaje žadańnie - vyspacca, - skazaŭ Alaksandr. - Ja nie spaŭ amal dvoje sutak, chvalavaŭsia».
Na pytańnie, što jon šaptaŭ padčas pracesu, skazaŭ, što čytaŭ malitvu «Mahutny Boža».
Alaksandr zaznačyŭ, što ŭmovy na Vaładarskaha - nieparaŭnalna lepšyja, čym u śledčym izalatary na Akreścina, choć paśla haładoŭki, jakuju jon trymaŭ z 11 pa 19 listapada, Alaksandra pieraviali ŭ kamieru z kryminalnikami.
* * *
Z apošnim słovam vystupiŭ Alaksandar Barazienka.
Jon skazaŭ: «Pierad vami znachodzicca čałaviek, jaki, pavodle słovaŭ ministra ŭnutranych spraŭ Uładzimira Navumava, źbivaŭ amonaŭcaŭ i byŭ destabilizataram situacyi ŭ našaj krainie.
Jašče dva hady tamu ja nie dumaŭ, što apynusia na łavie padsudnych. Tady ja byŭ paśpiachovym studentam BDU, ale atmaśfiera strachu i hłupstva ŭ krainie prymusiła mianie zaniacca hramadskaj dziejnaściu.
Jak pakazali nastupnyja padziei, naša ŭłada nie lubić aktyŭnych i razumnych, a ŭkładvaje hrošy ŭ dehienierataŭ.Paśla ja źviedaŭ pravakacyi, zatrymańni, pieražyŭ źbićci, turmu i narešcie, sud».
A. Barazienka zaznačyŭ, što sam nie zaŭsiody byŭ prykładam dla inšych, što časta pavodziŭ siabie ehaistyčna. Alaksandr skazaŭ, što raskajvajecca, što nie byŭ z tavaryšami na pieršaj častcy "Pracesu 14", a źjechaŭ u Polšču.
"Kali vysoki sud ličyć mianie vinavatym, to moža mianie rasstralać: ja svoj vybar zrabiŭ i hatovy da lubych nastupstvaŭ".
Jon zaznačyŭ, što dobraachvotna źjaviŭsia da śledčaha, kab pakazać usiu iłžyvaść i bajaźlivaść uładaŭ. Alaksandr padkreśliŭ, što i dalej budzie zmahacca za pieramieny i "našu svabodu".
Alaksandr źviarnuŭ uvahu na toje, što hety praces pakazvaje naiŭnaść tych, chto hatovy da sastupak z boku režymu: asudžanymi zastajucca 10 čałaviek (fihuranty spravy 14-ci),
nie źniatyja sudzimaści z Kazulina, Parsiukieviča, Kima. "Za kratami znachodžusia i ja -- tak pravodzicca libieralizacyja".
«Kali ja viarnuŭsia ŭ Biełaruś, to pastupiŭ pa sumleńni. Prašu vysoki sud kiravacca sumleńniem i vynieści adziny mahčymy apraŭdalny prysud.
Barazienka skončyŭ pramovu cytataj kłasika: "Ludzi nie astravy, a častka macieryka, i zło viartajecca da kryŭdziciela. Nie pytajcie, pa kim hučyć zvon, mahčyma, jon hučyć pa vas".
* * *
12:51 Advakat Pavieł Sapiełka: Aktyŭnych dziejańniaŭ i parušeńnia zakonu ŭ majho padabaronnaha nie dakazana. Tamu jon prosić apraŭdać svajho padabaronnaha.
12:40 Prakuror Cichaviec patrabuje pakarać Alaksandra Barazienku 1,5 hadami abmiežavańnia voli, ale biez nakiravańnia ŭ kałoniju.
12:16 Pačalisia sudovyja sprečki.
11:36 Abvieščany pierapynak.
11:21 Pačałosia aznajamleńnie ź piśmovymi materyjałami spravy.
11:14 Pad voknami suda pačałasia moładzievaja akcyja salidarnaści. Jaje ŭdzielniki stajać z raściažkaj "Za svabodu" dy hukajuć "Žyvie Biełaruś", "Hańba!", "Svabodu!".
11:01 Pačaŭsia prahlad treciaj videakasiety. Barazienku pakul nie bačyli ni razu.
10:23 Pačynajecca prahlad videa.
10:18 Davyklikali jašče ŭ jakaści śviedki pradprymalnika Ihar Lednika.
10:15 Daje pakazańni vadziciel maršrutki Hradziuška. Jon taksama kaža, što nie pamiataje ŭ toj dzień niejkaha hrašovaha pravału.
Kaža, kali davaŭ pakazańni, to lažaŭ u balnicy, jaho "vyklikaŭ apieratar i zrabiŭ prapanovu, ad jakoj jon nie zmoh admovicca".
10:06 Prajšoŭ dopyt dyrektara pryvatnaj firmy taksi Bułyčova. Jon kaža, što 10 studzienia hrašovych strataŭ u jaho firmy nie było.
9:59 Dapytvajuć supracoŭnika DAI Alaksieja Karziuka. Jon kaža, što vydatna pamiataje padziei 10 studzienia. Demanstranty, kaža, byli vielmi ahresiŭnyja.
9:45 Ludziej zapuścili ŭ zału. Što praŭda, studenty pieršymi nie prajšli.
Adnak nasupierak prahnozam, praces pradoŭžycca z apytańnia śviedkaŭ. Źjavilisia try novyja.
9:29 U budynak suda puścili tolki kala 20 čałaviek. Prajšli svajaki Alaksandra (baćka, maci dy inš.), kalehi, pryjšli padtrymać chłopca Alaksandr Kazulin, Alaksandr Milinkievič, Anatol Labiedźka, pravaaabaronca Enira Branickaja.
Pryjšli taksama z-pad pałki studenty histfaku BDU. Na dziva zmročnyja i zasiarodžanyja i pastajanna azirajucca pa bakach. Vočki biehajuć, vinavatyja :)
Kaliści histfak BDU - daŭno toje było, u pačatku 1990-ch, byŭ u avanhardzie nacyjanalnaha adradžeńnia i volnaj dumki. Studentaŭ i vykładčykaŭ možna było sustreć na roznych antyŭradavych demanstracyjach.
***
Praces siońnia pavinien pačacca z razhladu materyjałaŭ spravy. U paniadziełak byli zasłuchanyja śviedki – nichto ź ich nie paćvierdziŭ aktyŭnaha ŭdziełu Alaksandra ŭ mitynhu i šeści pradprymalnikaŭ.
Tolki namieśnik načalnika DAI Padbiarozkin skazaŭ, što manifiestanty mieli antydziaržaŭnuju simvoliku i raściažku dy surova łajalisia matam. Ale Barazienku ŭ tvar nie paznaŭ,
Alaksandr Barazienka — apošni z abvinavačanych pa spravie 14‑ci junakoŭ i dziaŭčat, što ŭziali ŭdzieł u manifestacyi za źmienu ekanamičnaj palityki ŭ studzieni. Chłopcu pahražaje turemnaje źniavoleńnie. Ad 27 kastryčnika Alaksandr znachodzicca ŭ śledčym izalatary.
***
Alaksandr Barazienka naradziŭsia 9 maja 1988 h. u Pinsku. Tam ža skončyŭ škołu. Da svajho aryštu navučaŭsia ŭ Polščy pavodle prahramy Kalinoŭskaha
Kamientary